ސިޔާސީ ދާއިރާގައި އުޅޭ ފަރާތްތަކަށް އަމާޒުކޮށް ރައްޔިތުން ބަސްބުނާނެކަމަށް ޕީޕަލްސް ނޭޝަނަލް ފްރަންޓް ޕީއެންއެފްގެ ސެކްރެޓަރި ޖެނެރަލް މުހައްމަދު މަލީހު ޖަމާލް ވިދާޅުވެއްޖެއެވެ.

މަލީހު މިފަދައިން ވިދާޅުވެފައިވަނީ ކުރެއްވި އެކްސް ޕޯސްޓެއްގައެވެ.

އެގޮތުން ސިޔާސީ މީހުންނަށް ރައްޔިތުން ފާޑު ކިޔައި، ހަޖޫ ޖަހައި މަލާމާތްވެސް ކުރާނެކަމަށް މަލީހުގެ ޕޯސްޓުގައި ފާހަގަ ކުރައްވާފަވެއެވެ.

އެގޮތުން ސިޔާސީ މީހުންގެ އާއިލާތަކާއި ގުޅޭ ގޮތުންވެސް ރައްޔިތުން ވާހަކަ ދައްކާނެކަމާއި އެވާހަކަތަކަކީ ތެދު ވާހަކަތަކަށްވެސް އަދި ދޮގު ވާހަކަތަކަށްވެސް ވެދާނެކަމަށް މަލީހު ފާހަގަ ކުރެއްވިއެވެ.

އެހެންކަމުން އެފަދަ ކަންކަމާއި ކުރިމަތިލުމުގެ ހިތްވަރު ނެތް ބޭފުޅުން ސިޔާސީ މައިދާނަށް ނުނިކުތުމަށްވެސް މަލީހުވަނީ ގޮވާލައްވާފައެވެ.

މަލީހު މިފަދައިން ވިދާޅުވެފައިވާއިރު ރާއްޖޭގެ މަޝްހޫރު ނޫސްވެރިޔާ އަދި އަދަދު ނޫހުގެ ޗީފް އެޑިޓަރ ހުސެއިން ފިޔާޒް މޫސާ އަށް، ރައީސް ޑރ. މުޙައްމަދު މުޢިއްޒު އިންޒާރު ދެއްވިކަމަށް ބުނާ އަޑުތަކެއް ވަނީ ފެތުރިފައެވެ. އަދި މޯލްޑިވިއަން ޑިމޮކްރެޓިކް ޕާޓީ އެމްޑީޕީ މުޒާހަރާއެއްގެ ތެރެއިން ރައީސްގެ ދަރިކަލުންނާއި ގުޅުވައި ދެއްކި ވާހަކަތަކަކާއި ގުޅިގެން އެ ޕާޓީގެ ޗެއާޕާސަން ފައްޔާޒް އިސްމާއިލްގެ އިތުރުން ގަލޮޅު ދެކުނު ދާއިރާގެ މެމްބަރު މީކާއީލް ނަސީމްގެ މަންމާފުޅު މަރިޔަމް ޒުބައިރު އާ ދެކޮޅަށް ކޯޓަން ދާން ރައީސްގެ އާއިލާއިން ނިންމާފައިވެއެވެ.