ސުޕްރީމު ކޯޓުގެ ފަނޑިޔާރުން ކަމަށްވާ މަހާޒު އަލީ ޒާހިރާ އަޒްމިރަލްދާ ޒާހިރުގެވެސް ކޮރަޕްޝަންގެ މައްސަލައެއް ނޯންނާނެ ކަމަށާ އެއީ އެއަށްވުރެ އިންޓަގްރިޓީ ހައި ބޭފުޅުން ކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.

ރައީސް ޔާމީން މިފަދައިން ވިދާޅުވީ ބުރާސްފަތި ދުވަހުގެރޭ ބޭއްވި ޕީއެންއެފް ޖަލްސާގައި ވާހަކަ ދައްކަވަމުންނެވެ.

ރައީސް ޔާމީން ވިދާޅުވީ، ރައީސް މުހައްމަދު މުއިއްޒުގެ ސަރުކާރުގައި ގެންދަވަނީ ރައީސް އިބްރާހިމު މުހައްމަދު ސޯލިހުގެ ސަރުކާރުން އުފެއްދި ދަރަނީގެ ސަބަބުން އަރަނީގައި ގައުމު ނުހިންގިގެން ކަމަށް ވިދާޅުވާއިރު ރައީސް މުއިއްޒު ގެންދަވަނީ އެސްއޯއީތަކަށް ލިބޭ ފައިސާ ބޭނުންކުރައްވަމުން ކަމަށެވެ. އަދި އެ ފަދަ ގޮތަކަށް ރައްޔިތުންގެ ފައިސާއަށް ޚިޔާނާތްތެރިވަމުން ގެންދާ ބޭފުޅަކު އެހެން ބޭފުޅުންގެ އިންޓަގްރިޓީއާ މެދު ސުވާލު އުފައްދަން މައްސަލަތައް އުފަންކުރުވައިގެން ޖަހަމުން ދަނީ ސަކާރާތް ކަމަށް ރައީސް ޔާމީން ވިދާޅުވިއެވެ.

ރައީސް ޔާމީން ވިދާޅުވީ، ގައުމުގައި މިއަދު ނަޒާހާތްތެރި ފަނޑިޔާރުން ވަކިކުރަން ނޭނގޭ ހާލަތަށް ކަންކަން ގޮސްފި ކަމަށާ ނަމަވެސް ސުޕްރީމު ކޯޓުގެ ތެރެއިން ބައެއް ފަނޑިޔާރުންގެ މައްސަލަތައް އުފައްދައިގެން ސުލޫކީ މައްސަލަ ބަލަމުންދާއިރު، މަހާޒު އާ އަޒްމިރަލްދާގެ ކޮރަޕްޝަންގެ މައްސަލައެއް ނޯންނާނެ ކަމަށް ތަކުރާރުކޮށް ވިދާޅުވާން ކެރިވަޑައިގަންނަވާ ކަމަށް ވެސް ރައީސް ޔާމީން ވިދާޅުވިއެވެ.

ރައީސް ޔާމީން ވިދާޅުވީ، ވަކި ފަނޑިޔާރުންގެ ސުލޫކީ މައްސަލަ އުފަން ކުރުވުމަށް ފަހު އަނެއްބައި ފަނޑިޔާރުންގެ މައްސަލަތައް ސަރުކާރަށާ ޖޭއެސްސީއަށް ނުފެންނަ ސަބަބާ މެދު ސުވާލު އުފެދޭ ކަމަށާ އެފަދަ ކަންކަމުގެ ސަބަބުން ސަރުކާރުގެ ނިޔަތާ މެދު ސުވާލު އުފައްދަން ހަގީގަތުގައިވެސް ޖާގަ ލިބިގެން ދާ ކަމަށެވެ.

ރައީސް ޔާމީން މިފަދައިން ވިދާޅުވެފައި މިވަނީ ސުޕްރީމު ކޯޓުގައި ދުސްތޫރީ މައްސަލައެއް އޮއްވާ ސުޕްރީމު ކޯޓުގެ ތިން ފަނޑިޔާރެއްގެ ސުލޫކީ މައްސަލަތަކެއް ކުއްލިއަކަށް ފެންމަތިކޮށް ސަސްޕެންޑްކުރުމާ ގުޅިގެން ސަރުކާރަށް ފާޑުކިޔުން އަމާޒުވެފައި ދަނޑިވަޅެއްގައެވެ. ސަސްޕެންޑް ކުރި ފަނޑިޔާރުންގެ ތެރެއިން ހުސްނުއްސުއޫދު ވަނީ އިސްތިއުފާ ދެއްވާފައެވެ.