މޯލްޑިވްސް ބްރޯޑްކާސްޓިން ކޮމިޝަން (ބްރޯޑްކޮމް) ގެ ނައިބު ރައީސް މުހައްމަދު ފަޒީން، އެ ކޮމިޝަނުން އިސްތިއުފާދެއްވައިފި އެވެ.
އޭނަ މިއަދު އިސްތިއުފާ ދެއްވީ ބްރޯކޮމްގެ އަންހެން މުވައްޒަފަކަށް ފަޒީން ޖީންސީ ގޯނާކުރިކަމުގެ ތުހުމަތު ކުރެވި އޭނަމަގާމުން ވަކިކުރުމުގެ މައްސަލަ ރައްޔިތުންގެ މަޖިލީހުން ބަލަމުން ދަނިކޮށް، އެ ތުހުމަތުތަކަށް އިންކާރުކުރުމަށް ފަހު އެވެ.
ކުރިން ނޫސްވެރިއެއްގެ ގޮތުގައި މަސައްކަތް ކުރަމުން އައި ފަޒީންގެ އިސްތިއުފާގެ ސިޓީ ވެސް މިއަދު ވަނީ ރައީސް ޑރ. މުހައްމަދު މުއިއްޒަށް ހުށަހަޅައިފަ އެވެ. ސިޓީގައި އޭނަ ވިދާޅުވީ ބްރޯޑްކޮމްގެ މެންބަރެއްގެ ޒިންމާތަކާއި މަސްއޫލިއްޔަތުތައް މިނިވަންކަމާއެކު، ވަކި ފަރާތަކަށް ނުޖެހި އަދާކުރުމަކީ މިހިނދަށް ވެވެން ނެތް ކަމެއްކަމުގައި ދެކޭތީ އެ މަގާމުން އޭނާ އިސްތިއުފާ ދީފައިވާ ކަމަށެވެ.
ނަމަވެސް ނޫސްވެރިކަމަށް އަންނަ ހަމަލާތައް ދިފާއުކުރުމާއި، މިނިވަން ދިމިގްރާތީ މުޖުތަމައުއެއް ދެމެހެއްޓުމަށްޓަކައި ނޫސްވެރިކަމުގެ މިނިވަންކަމަށް ކެނޑިނޭޅި މަސައްކަތް ކުރާ މީހެއްގެ ގޮތުގައި ދެމިހުންނާނެ ކަމަށް ބުނެފައިވެ އެވެ.
ބްރޯޑްކޮމްގެ މެންބަރަކަށް ފަޒީން އައްޔަންކޮށްފައިވަނީ 7 މާޗު 2021ގަ އެވެ. އެ ކޮމިޝަނުގެ ނައިބު ރައީސްގެ މަގާމަށް އޭނާ އައްޔަންކޮށްފައިވަނީ 19 ޖެނުއަރީ 2023ގަ އެވެ.
