ރައީސް އަބްދުﷲ ޔާމީން އަބްދުލް ޤައްޔޫމް ދެކޭ ގޮތުގައި މިހާރު ޒުވާނުންނަަށް އެންމެ މުހިންމީ ވަޒީފާގެ ފުރުސަތު ކަމަށް އެމަނިކުފާނު ވިދާޅުވެއްޖެއެވެ.

ރައީސް ޔާމީން މިފަދައިން ވިދާޅުވީ، އެމަނިކުފާނުގެ ޕާޓީ ޕީޕަލްސް ނެޝަަނަލް ފްރަންޓް (ޕީއެންއެފް) އިން ކުރިއަށް އޮތް ރައްޔިތުންގެ މަޖިލިސް އިންތިހާބުގައި ވާދަކުރެއްވުމުގެ ޝައުގުވެރިކަން ފާޅުކޮށްފައިވާ ކެންޑިޑޭޓުން ތައާރަފް ކުރުމަށް ބޭއްވި ޖަލްސާގައި ވާހަކަފުޅު ދައްކަވަމުންނެވެ.

އެގޮތުން ރައީސް ޔާމިން ވިދާޅުވީ، އެމަނިކުފާނު ދެކިލައްވާ ގޮތުގައި މިހާރު ޒުވާނުންނަށް އެންމެ މުހިންމީ ވަޒީފާގެ ފުރުސަތުކަމަށެވެ.

މީީގެ އިތުރުން ރައީސް ޔާމީންވަނީ އެމަނިކުފާނުގެ ކެންޑިޑޭޓުންގެ ފަރާތުން ޒުވާނުންނަށް ވަޒީފާގެ ފުރުސަތު ހޯދައިދިނުމަށް މަސައްކަތް ކުރުމަށް ގޮވާލައިފައެވެ.

މީގެ ކުރިންވެސް ރައީސް ޔާމީން ވަނީ ޒުވާނުންގެ ހައްގުގައި އެތައް ފަހަރެއް މަތިން އަޑު އުފުލައިފައެވެ. އަދި ހާއްސަކޮށް ކުރިން އެމަނިކުފާނުގެ މެނިފެސްޓޯގައިވެސް ޒުވާނުންނަށް ހާއްސަ އިސްކަމެއް ދެއްވާގެން މަޝްރޫއުތަކެއް ކރިއަށް ގެންދިއުމަށް ހަމަ ޖައްސަވާފައިވާކަން ފާހަގަކޮށްލެވެއެވެ.