ރައީސް މުއިއްޒެވެ. ޣައްޒާގެ ހަނގުރާމަ ހުއްޓާލަން ދުނިޔެއަށް ގޮވާލާއިރު، ސަހްޔޫނީންގެ ޕާސްޕޯޓު މަނިކުފާނު މަނާކުރެއްވިއްޔާ ކީއްތޯއެވެ. / ތޭރަގްރެފިކްސް
ރިޕޯޓު
ރައީސް މުއިއްޒެވެ. ޣައްޒާގެ ހަނގުރާމަ ހުއްޓާލަން ދުނިޔެއަށް ގޮވާލާއިރު، ސަހްޔޫނީންގެ ޕާސްޕޯޓު މަނިކުފާނު މަނާކުރެއްވިއްޔާ ކީއްތޯއެވެ.
19 މާރިޗު 2025
މާލެ ސިޓީ

"ފަލަސްތީނުގެ ޣައްޒާއަށް އިޒްރޭލުން ދޭން ފަށާފައިވާ ލާއިންސާނީ ހަމަލާތައް ހުއްޓުވަން މުޅި ދުނިޔެ ތެދުވުމަށް ރާއްޖެއިން ގޮވާލައިފި" މިއީ މިއަދު ރާއްޖޭގެ ނޫސްތަކުގައި އޮތް ފަލަ ސުރުހީއެކެވެ. މި ސުރުހީ ކިޔާލުމުން ބައެއް މީހުންނަށް ނޫނީ ދުނިޔޭގެ ބައެއް ލިޑަރުންނަށް ހީވެދާނެއެވެ. ދިވެހި ތަޚުތުގައި ރެދަނލި ކުރައްވަމުން ގެންދަވަނީ ހައުދަހާވާ އިސްލާމީ ވިންދު ޖަހާ ވެރިއެކެވެ. ޣައްޒާގެ މުސްލިމުންނާ މެދު އެމަނިކުފާނުގެ ހިތްޕުޅުގައި އޮތް ލޯބި އުތުރި އަރަނީއޭ ވެސް ހިތަށް އަރާފާނެއެވެ.

ނަމަވެސް މުސްކުޅިން ބުނެ އުޅޭ ބަހެއް އޮވެއެވެ. މީހެއްގެ ނިޔަތް ރަގަޅަށް އެނގެން ބޭނުން ނަމަ އެމީހަކު އެކަމެއްގައި އަމަލުކުރާ ކުރުމަށް ބަލާށެވެ. ދެއްކާ ވާހަކައަކަށް ނުބަލާށެވެ. އެހެންކަމަށް ވަނީ ނަމަ ސަހްޔޫނީން ޣައްޒާގެ ނިކަމެތި ރައްޔިތުންނާ މެދު ކަންކުރަމުންދާ ގޮތަށް ބަލާ ދިވެހި ރައްޔިތުންގެ އަޑު ސަރުކާރަށް އިއްވަން އެތައް ފަހަރަކު ރައްޔިތުން ކުރި މަސައްކަތް ކާމިޔާބު ނުވެ ރައްޔިތުންގެ އެދުން މި ސަރުކާރުން ބޮލާލާ ޖަހާ މަޖިލީހުގައި ސަހްޔޫނީންގެ ޕާސްޕޯޓު މަނާ ކުރި ބިލު ޕާކުކޮށްފައި އޮންނަތާ މިހާރު 282 ދުވަހަށް ވުރެ ގިނަ ދުވަސްވެފައިވާއިރު، ޣައްޒާގެ ރައްޔިތުންނާ މެދު ކުޑައިކޮށްވެސް ވެރިމީހާގެ ހިތުގައި ހަމްދަރުދީ އޮތްނަމަ ނިރުބަވެރި ބަޔަކު، އެތައް މުސްލިމުންނެއްގެ ލޭ އެ ބައެއްގެ އަތުގައި ހޭކިފައި ތިބި ބަޔަކު މި ގައުމަށް އެތެރެވުން މަނާނުކުރެިގެން އުޅޭ ސަބަބާމެދު ހައިރާން ނުވޭތޯއެވެ؟

ތިމަން މަނިކުފާނަކީ އެންމެ އުޚްވައތްތެރި ވެރިޔާގެ ގޮތުގައި ކަން ދެއްކުމަށް ނިކަމެތި މުސްލިމުންނގެ ނަން ބޭނުންކޮށް އެ ހަނގުރާމަ ހުއްޓާލަން ދުނިޔެއަށް ތިބާ ގޮވާލާއިރު އެކަމުގައި ތިމާގެ އިޚުލާސްތެރިކަން ދައްކަންވީ ކަމުގައި މިއޮތީ ފެެއިލްވެފައި ނޫންތޯއެވެ؟

މުސްލިމުންނަކީ ހަށިގަނޑެއް ފަދަ ބަޔަކަށް ބާއިރު އެ މުސްލިމަކަށް ކުރާ އަނިޔާއަކީ އަނެއް މުސްލިމަކަށް އެކަމުގެ ތަދު އިހުސާސްވާން ޖެހޭނެ ކަމެކެވެ. ނަމަވެސް ޣައްޒާގެ ރައްޔިތުންނަށް ސަހްޔޫނީން ދެމުންދާ އަނިޔާއާ ކުރަމުންދާ ނަސްލު ހޭދަ އާ ދެކޮޅަށް އެ ނިރުބަވެރިންގެ ޕާސްޕޯޓު މަނާކުރަން ރައީސް ޑރ މުއިއްޒަށާ އަދި ސަރުކާރަށް ނުކެރުމަކީ ދިވެހި ސަރުކާރު އެކަމުގައި ކޮމްޕްރޮމައިޒްވެފައިވާ މިންވަރު ހާމަވާ ކަމކެވެ.

ރައީސް އަބްދުﷲ ޔާމީން ވިދާޅުވާ ފަދައިން ޣައްޒާގައި ތިބި މުސްލިމުންގެ ހައްގުގައި ހިޕޮކްރެސީ ގެންގުޅުއްވަމުން ރައީސް މުއިއްޒު މި ޖައްސަވަނީ ކޮން ސަކަރާތެއްތޯއެވެ؟

ހަނގުރާމަ ހުއްޓާލަން މުޅި ދުނިޔެއަށް މަނިކުފާނު ގޮވާލައްވާއިރު މަނިކުފާނުގެ ބާރު އޮތް މަނިކުފާނުގެ މަޖިލީހުން ސަހްޔޫނީންގެ ޕާސްޕޯޓު މަނާކުރާ ބިލާ މެދު ގޮތެއް ނިންމާ ނުލެވި އަހަރު ދެ އަހަރު ވެގެން ދިއުމުން މަނިކުފާނުގެ އަސްލު ސޫރަ ހަގީގަތުގައިވެސް މިކަމުގައި ހާމަވެއެވެ. ފަނޑިޔާރުން މަދުކުރާ ބިލާ އެންޓި ޑިފެކްޝަން ބިލާ ޓުއަރިޒަމް ދާއިރާގެ ބިލު ފަދަ ބިލުތައް އެއް ދުވަހުން ނުވަތަ މަދު ގަޑިއިރުތަކެއްގެ ތެރޭގައި ފާސްކޮށް ތަސްދީގުކުރައްވާއިރު ފަލަސްތީނުގެ ލޮބުވެތި މުސްލިމުންގެ ހައްގުގައި ޕާސްޕޯޓެއް މަނާކޮށްލަން ނުކެރިގެން މިއުޅެނީ ހަގީގަތުގައިވެސް ހައުދަހާ ވަރަކަށް ގޮނޑިކޮއްކޮ ވެފައި ތިބުމުންނެވެ.

ގައުމުގައި އެތައް ރައޔްިތުންނެއް އެ ޕާސްޕޯޓު މަނާކުރަން ގޮވަމުންދާއިރު އެކަން އިރަށް ދިއްކުރާ ތޮށަލި ގަނޑު ހޯދަން ދުވުމެކޭ އެއްފަދަ ކޮށް ސަރުކާރުން މަޖިލީހަށް މަޖިލީހުން ސަރުކާރަށް ޖާމިނު ކޮށްކޮށް ވަގުތުތައް ދުއްވާލަނީ ގައްޒާގެ ރައްޔިތުންނާ މެދު މި ސަރުކާރުގެ ވެރިންގެ ކިބައިގައި ހަގީގަތުގައިވެސް ރަހުމެއް ކުލުނެއް ލޯތްބެއް އިސްލާމީ އުޚުވަތްތެރިކަމެއްވެސް ނެތުމުންނެވެ.

ރައީސް މުއިއްޒެވެ. ސަހްޔޫނީ ޕާސްޕޯޓު މަނާ ކުރިކަމަށް ދައުލަތުުން ބުނެ ދޮގު ހެދި ފަހުން މި އަހަރުގެ ޖެނުއަރީ މަހުގެ ނިޔަލަށް ސަހްޔޫނީންގެ 1541 މީހުން ރާއްޖެއަށް އެތެރެވެފައިވާއިރު، ޣައްޒާގެ ހަނގުރާމަ ހުއްޓާލަން ދުނިޔެއަށް ގޮވާލާލުމާ އެކު، ސަހްޔޫނީންގެ ޕާސްޕޯޓު މަނިކުފާނު ވެސް މަނާކުރެއްވިއްޔާ ކީއްތޯއެވެ.

ކޮމެންޓު
Copyright © 2013-2025 Media Ring Pvt Ltd.
All rights reserved