

ޕްރައިވެޓް އިންޝުއަރެންސް އޮންނަ މީހުންނަށް، އެ އިންޝުއަރެންސްއަށް ކެނޑުމަށް ފަހު އާސަންދަ ލިބޭ ގޮތަށް ނިންމި ނިންމުން ބަދަލުކޮށް، ޕްރައިވެޓް އިންޝުއަރެންސާ އެކު ވެސް އާސަންދަ ލިބޭ ގޮތަށް އަނެއްކާވެސް ހަދައިފިއެވެ.
އާސަންދަ ރިފޯމްކުރަން ފަށައި، އެ ސްކީމަށް ގެނައި ބަދަލުގެ ދަށުން، ޕްރައިވެޓް އިންޝުއަރެންސެއް އޮތް ނަމަ، އޭގެ ލިމިޓް ހަމަވުމުން ނޫން ގޮތަކަށް އާސަންދަ ދޫނުކުރަން ފެށީ މިދިޔަ އަހަރުގެ ނޮވެމްބަރު މަހުން ފެށިގެންނެވެ.
އެންސްޕާ އިން އޭރު ބުނި ގޮތުގައި ޕްރައިވެޓް އިންޝުއަރެންސް ނަގާފައިވާ ނަމަ އެ ފަރާތްތަކަށް އާސަންދަ ލިބޭނީ އެ މީހުންގެ ފެކޭޖުގެ ލިމިޓް ހަމަވުމުން ކަމަށެވެ.
ނަމަވެސް އޭގެ ފަސް މަސް ފަހުން ނިންމުން ބަދަލުކުރީ ކީއްވެކަން އާސަންދައިން އަދި ހާމައެއްނުކުރެއެވެ. ނަމަވެސް އެ ބަދަލު ގެނެސްފައިވާ ހޮސްޕިޓަލުތަކުންނާ ކްލިނިކުތަކުން ވެސް ވަނީ ކަށަވަރުކޮށްދެއްވާފައެވެ.
މައުލޫމާތު ލިބިފައިވާ ގޮތުގައި އެ އުސޫލަށް އާސަންދަ ކުންފުނިން ބަދަލު ގެނެސްފައިވަނީ މި ހަފުތާގެ ތެރޭގައެވެ.
ގެނައި ބަދަލުން، ކޮންސަލްޓޭޝަނަށް ފުރަތަމަ ޗާޖުކުރާނީ އަމިއްލަ އިންޝުއަރެންސުންނެވެ. އާސަންދައިން ކަނޑާނީ ބާކީ އަދަދެވެ. އެހެންވެ، އަމިއްލަ ޖީބުން ކުރަންޖެހޭ ހަރަދު ކުޑަވެގެންދާނެއެވެ.