ކުރީގެ ކޮންޓްރޯލަރ އޮފް އިމިގްރޭޝަން މުހައްމަދު ޝަމްއާން ވަހީދު ފުލުހުންގެ ހައްޔަރަށް ގެންގޮސްފައިވަނީ އޭނާ މީޑިޔާތަކަށް ޚާއްސަ މައުލޫމާތުތަކެއް ހިއްސާކުރަން ތައްޔާރުވެފައިވަނިކޮށް ކަމަށް މައުލޫމާތު ލިބިއްޖެއެވެ.

"ތޭރަ އޮންލައިން"އަށް މައުލޫމާތު ލިބިފައިވާ ގޮތުގައި ޝަމްއާން ދިރިއުޅޭ ގެއިން ފުލުހުންގެ ބެލުމުގެ ދަށަށް ގެންދިޔަ ތަކެތީގެ ލިސްޓުގައި ސޮއިކުރުމަށް ފުލުހަށް ހާޒިރުވުމަށް އަންގާ އެ އެންގުމާ އެއް ގޮތަށް ޝައްމާން ފުލުހަށް ހާޒިރުވުމުން ފުލުހުން ވަނީ ކޯޓުގެ އަމުރެއްގެ ދަށުން އޭނާ ހައްޔަރުކޮށްފައެވެ.

އޮޅުވާލައިގެން ފުލުހަށް ހާޒިރުކޮށް ޝަމްއާން ހައްޔަރުކުރީ ފުލުސް އޮފީހުން ނުކުމެ މީޑިޔާތަކަށް މުހިއްމު މައުލޫމާތުތަކެއް ހިއްސާ ކުރަން އޭނާ ނިންމާފައިވަނިކޮށް ކަމަށް މައުލޫމާތު ލިބިފައިވެއެވެ.

އެގޮތުން ޝަމްއާން ހައްޔަރުކުރީ، ރައީސް ޑރ މުހައްމަދު މުއިއްޒާ ގުޅުން އޮތް ބޮޑު ކޮރަޕްޝަނެއްގެ ވާހަކަ ތިލަކުރަން ނިންމާފައިވަނިކޮށް ކަމަށް ވެއެވެ.

ޝަމްއާން މަގާމުން ވަކިކޮށްފައިވަނީ ބިދޭސީންގެ އަތުން ފައިސާ ނަގާ މައްސަލައިގައި އިމިގްރޭޝަންގެ އޮފިސަރުންތަކެއް ހައްޔަރުކޮށް މައްސަލައެއް ތަހުގީގުކުރަމުންދާ ކަމަށް ދިވެހި ފުލުހުން ހާމަކުރިތާ ގިނަ އިރު ތަކެއް ނުވަނީސް އެވެ.

ޝަމްއާން ހައްޔަރުކޮށްފައި މިވަނީ ތުރުކީގެ އިސްމާއިލް ނަމަކަށް ކިޔާ މީހަކު މެދުވެރިކޮށް ރައީސް މުއިއްޒު މިސައިލްތަކެއް ނުއަގުގައި ގަންނަން ރާވަމުންދިޔަ ކަމުގެ އަޑުތަކެއް ގަދަވެފައިވަނިކޮށެވެ.

ޝަމްއާން ހައްޔަރުކޮށްފައިވަނީ ރައީސް މުއިއްޒުގެ ސީދާ އިރުޝާދުގެ ދަށުން ކަމަށްވެސް މައުލޫމާތު ލިބިފައިވެއެވެ.