ސަހްޔޫނީން ގާޒާއަށް ދިން ވަކިވަކި ވައިގެ ހަމަލާތަކުގައި އަލް ޖަޒީރާގެ ނޫސްވެރިއެއް ހިމެނޭ ގޮތަށް ދެ ނޫސްވެރިން ޝަހީދުކޮށްލައިފި އެވެ.

އަލްޖަޒީރާއިން ބުނީ، ހުއްސާމް ޝަބާތު ޝަހީދުކޮށްލާފައިވަނީ، އޭނާ ދަތުރުކުރަމުންދިޔަ ކާރަށް އަމާޒުކޮށް އިޒްރޭލުން ދިން ވައިގެ ހަމަލާއެއްގައި ކަމަށެވެ. ސަހްޔޫނީން މީގެކުރިން ގާޒާއަށް ދިން ހަމަލާއެއްގައި ހުސާމަށް ވަނީ އަނިޔާވެސް ވެފަ އެވެ. ނަމަވެސް މަސައްކަތް ހުއްޓާލަން އޭނާ ބޭނުންނުވީ ކަމަށް އަލް ޖަޒީރާއިން ބުނެ އެވެ.

ހުއްސާމްގެ އިތުރުން، ޕަލަސްތީން ޓުޑޭ ޓީވީގައި މަސައްކަތް ކުރާ މުހައްމަދު މަންސޫރު ނަމަކަށް ކިޔާ ނޫސްވެރިއަކު ވެސް އިޒްރޭލުން ޝަހީދުކޮށްލާފައިވާ ކަމަށް އެ ޓީވީން ބުންޏެވެ.

މީގެ ކުރިންވެސް ޣައްޒާގައި އަލްޖަޒީރާގެ ނޫސްވެރިން ޝަހީދުކޮށްލާފައި ވެއެވެ. ޕަލަސްތީނިއަން ޖާނަލިސްޓް ސިންޑިކޭޓުން ވަނީ ސަހްޔޫނީންގެ މި ހަމަލާއަކީ ހަގީގަތް ފޮރުވަން ރާވައިގެން ހިންގި ޓެރަރިސްޓު ހަމަލާތަކެއްގެ ގޮތުގައި ސިފަކޮށްފަ އެވެ.

ގާޒާގެ މީޑިއާ އޮފީހުން ބުނާ ގޮތުގައި 2023 ވަނަ އަހަރުގެ އޮކްޓޯބަރު މަހުން ފެށިގެން މިހާތަނަށް ސަަހްޔޫނީންގެ ހަމަލާތަކުގައި ޝަހީދުވެފައިވާ ނޫސްވެރިންގެ އަދަދު 208 އަށް އަރާފަ އެވެ.

މި އޮފީހުން ވަނީ ނޫސްވެރިންނަށް އަމާޒުކޮށް ދެމުންދާ ހަމަލާތައް ކުށްވެރިކޮށް، މި ޖަރީމާތަކުގައި ސަހްޔޫނީން އަދި އެމީހުންގެ މަދަދުގާރު އެމެރިކާ އަދި ހުޅަގުގެ ސަރުކާރުތަކަށް ޒިންމާ އުފުލުމަށް ގޮވާލާފަ އެވެ.