އިންޓަނޭޝަނަލް މަނިޓަރީ ފަންޑު އައިއެމްއެފުން ހަރަދު ކުޑަ ކުރުމަށް ކެނޑި ނޭޅި ރާއްޖެއަށް ގޮވާލަމުން ދަނިކޮށް ކުލަގަދަކޮށް ހުޅުމާލޭގައި ފިތުރު އީދު ފާހަގަ ކުރުމަށް ޑްރޯން ޝޯ އަކާއި ކުޑަ ކުދިންގެ ހަވީރެއް ބާއްވަން ހައުސިންގ ޑިވަލޮޕްމަންޓް ކޯޕަރޭޝަން އެޗްޑީސީން ނިންމައިފިއެވެ.
މިކަން ހާމަކޮށް އެޗްޑީސީގެ ރަސްމީ އެކްސް އެކައުންޓުންވަނީ ވީޑިއޯއެއްވެސް ނެރިފައެވެ.
ކުޑަ ކުދިންގެ ހަވީރު ކުރިއަށް ދާނީ ހުޅުމާލޭ ސެންޓްރަލް ޕާކުގައި ހަވީރު 16:00 އިން 17:45 އަށް ކަމަށް އެޗްޑީސީން މައުލޫމާތު ދެއެވެ. އަދި އީދު ދުވަހުގެ ރޭ ހަވާއެރުވުމާއި ޑްރޯންގެ ފަރި ހަރަކާތްތައް ކުރިއަށް ދާނެ ކަމަށްވެސް ހާމަކުރިއެވެ.
ސަރުކާރުންވަނީ މި އަހަރު އިތުރު ރަށްތަށް ދިއްލުމަށްޓަކައި ބޮކި ގަތުމަށް 28 މިލިއަން ރުފިޔާ ޚަރަދުކޮށްފައެވެ.
ދައުލަތުން މިފަދަ ނިންމުމެއް ނިންމާފައިވާއިރު ރާއްޖޭގެ ދަރަނި ބޮޑުވެ ބޭރު ފައިސާގެ ރިޒާވަށް ބާރުބޮޑުވާކަން ފާހަގަކޮށް ވީހާ ވެސް އަވަހަށް ނިޒާމީ ބަދަލުތައް ގެންނަންޖެހޭކަން އައިއެމްއެފުން ވަނީ ގޮވާލާފަ އެވެ.
ނަމަވެސް ބަޖެޓުގައި ހިމަނާފައި ހުރި އިގުތިސާދީ ރިފޯމް އެޖެންޑާގެ ކަންކަން ވީހާ ވެސް އަވަހަށް ފަށަންޖެހޭކަން އެ އިދާރާއިން ނެރުނު ބަޔާނެއްގައިވަނީ ފާހަގަކޮށްފައެވެ.
އާމްދަނީ އިތުރުކުރަން ސަރުކާރުން ގިނަ ފިޔަވަޅުތަކެއް އެޅި ނަމަވެސް ވީހާ ވެސް އަވަހަށް ޚަރަދުކުޑަކުރަން ބޮޑެތި ފިޔަވަޅުތަކެއް އަޅަންޖެހޭ ކަމަށް އައިއެމްއެފުން ގޮވާލާފައިވެ އެވެ.
