މެންދުރުން ފެށިގެން ދެކުނާއި މެދުރާއްޖެތެރޭގެ ރަށްތަކަށް ވިއްސާރަވެދާނެކަމަށް މޫސުމާއި ބެހޭ ގައުމީ އިދާރާ މޯލްޑިވްސް މިޓިއޮރޮލޮގިކަލް ސާވިސަސް މެޓު އޮފީހުން ހާމަކޮށްފިއެވެ.

އަދި ވިއްސާރަ ކުރެވޭނެކަމަށް ލަފާ ކުރެވެނީ ދެކުނުގެ ރަށްތަކަށް ކަމަށް މެޓުން ބުނެފައިވެއެވެ.

އެ ސަރަހައްދުގެ ރަށްތަކަށް ބޯކޮށް ވާރެވެހޭނެ ކަމަށާއި އެކަމަކު ކަނޑުތައް ގަދަވި ނަމަވެސް ދަތުރު ނުކުރެވޭ މިންވަރަށް ގަދަނުވާނެކަމަށް މެޓުން ހާމަ ކުރިއެވެ.

މީގެ އިތުރުން މެދުރާއްޖެ ތެރޭގެ ބައެއް ރަށްތަކަށް ކެރީގެ އަސަރު ފޯރުން އެކަށީގެންވާކަމަށް މައުލޫމާތު ދިނެވެ.

އެގޮތުން ދެކުނުގެ ރަށްތަކަށް 10 މޭލާއި 20 މޭލާ ދެމެދު ބާރުމިނެއްގައި ވައިޖެހޭނެ ކަމަށާއި މެދުރާއްޖެތެރެއާއި އުތުރުގެ ރަށްތަކަށް 5 މޭލާއި 15 މޭލާ ދެމެދުގެ ބާރުމިނެއްގައި ވައިޖެހޭނެ ކަމަށް މެޓުން ވަނީ ލަފާކޮށްފައެވެ.

އަދި މާދަމާ ހަވީރުން ފެށިގެން މޫސުން އަލިވާނެކަމަށްވެސް މެޓުން ލަފާކޮށްފައިވެއެވެ.

މޫސުމީ ބަދަލުތަކުގެ ސަބަބުން އިރުވައި މޫސުމުގައިވެސް ބޯކޮށް ވާރޭވެހުންވަނީ އާންމުވެފައެވެ. އެގޮތުން މި އިރުވައި މޫސުމުގައި ބޯކޮށް ވާރޭ ވެހުމުގެ ސަބަބުން އެކި ވަރުގެ ގެއްލުން އެކި ދުވަސްތަކުގެ މަތީން ލިބުނުކަން ފާހަގަކޮށްލެވެއެވެ.