ރައީސް ޑރ މުހައްމަދު މުއިއްޒުގެ ސަރުކާރުގައި ރިކަރަންޓު ޚަރަދު ހުރީ ރައީސް އިބްރާހިމު މުހައްމަދު ސޯލިހުގެ ސަރުކާރަށް ވުރެވެސް ޓާޝަރީ ފެންވަރުގައި ކަމަށް ވިދާޅުވެ ސަރުކާރުން ކުރަމުންދާ ބޭކާރު ޚަރަދާ ގުޅިގެން ރައީސް އަބްދުﷲ ޔާމީންގެ ފާޑުވިދާޅުވުން އަމާޒުކުރައްވައިފިއެވެ.

ޕީއެންއެފުން ބޭއްވި ޖަލްސާއެއްގައި ވާހަކަފުޅު ދައްކަވަމުން ރައީސް ޔާމީން ގައުމުގެ ދަރަންޏާ އަދި ޚަރަދު ވެސް އިންތިހާއަށް މައްޗަށް ޖެހިފައިވާކަން ފާހަގަކުރައްވާ އެކަންކަން ހައްލުކުރަން ސަރުކާރުން މަސައްކަތް ނުކުރައްވާތީ ނުުރުހުން ފާޅުކުރައްވާފައެވެ. ރައީސް ޔާމީން ވިދާޅުވީ ކުރީ ސަރުކާރުގެ ދަރަނި އިންތިހާއަށް މި ސަރުކާރަށް ވާރުތަވެފައި އޮތުމުން ރައްޔިތުންނަށް ޚިދުމަތް ކޮށްނުދެވިގެން އުޅެނީ ކަމަށް ސަރުކާރުގެ އެކި ފަންތީގެ ބޭފުޅުން ވިދާޅުވަމުން ގެންދަވާއިރު ދަރަނި އޮތުމަކީ ރައްޔިތުންނަށް ޚިދުމަތްކޮށް ނުދެވެން ޖެހޭ ސަބަބެއް ކަމުގައި އެމަނިކުފާނު ދެކެވަޑައި ނުގަންނަވާކަމަށް ވިދާޅުވެފައެވެ.

މީގެ އިތުރުން ރައީސް ޔާމީން ވިދާޅުވީ ދަރަނީގެ ވާހަކަ މި ސަރުކާރުގެ ވެރިން ދައްކަމުން ގެންދާއިރު އެ ދަރަނީގެ މައްޗަށް މި ސަރުކާރުން ވެސް އެތައް ބައިވަރު ދަރަންޏެއް އެންމެ 16 މަސް ދުވަސް ތެރޭ އުފައްދައިފި ކަމަށާ އެގޮތުން މި ސަރުކާރުން 16 މަސް ތެރޭގައި 130 ބިލިއަން ރުފިޔާގެ ދަރަނި އުފައްދާފައިވާކަން އެމަނިކުފާނު ފާހަގަކުރެއްވިއެވެ.

ހަމަ އެހެންމެ މި ސަރުކާރުން ކުރީގެ ސަރުކާރުގެ ކަރަދުތަކުގެ ވާހަކަ ދައްކާއިރު މި ސަރުކާރުން ވެސް ގެންދަނީ ސިޔާސީ މަގާމުތަކަށް ގނަ އަދަދަކަށް މީހުން އައްޔަންކުރުން ފަދަ ބޭކާރު ގިނަ ޚަރަދު ކުރަމުން ކަމަށާ އަދި ދައުލަތު ހިންގުމުގެ ޚަރަދު ކުޑަކޮށް އިސްލާހީ އިގްތިސޯދީ ފިޔަވަޅު އަޅަން ދުނިޔޭގެ މާލީ އިދާރާތަކުން ދޭ ލަފަޔަށް ސަރުކާރުން ބޯ ނުލަނބާކަން ވެސް އެމަނިކުފާނު ފާހަގަކުރެއްވިއެވެ.

އެމަނިކުފާނު ވިދާޅުވީ ދުނިޔޭގެ ގައުމުތަކުން ދަނީ ރާއްޖެއިން ގައުމުގެ އިގްތިސޯދާ މެދު އަޅަމުންދާ ފިޔަވަޅުތައް ކައިރިން ބަލަމުން ކަމަށާ އޭގެ ތެރޭގައި ރާއްޖެއަށް ގިނަ ލީނުތަކެއް ދޫކޮށްފައިވާ ޗައިނާއާ އިންޑިއާ ވެސް ހިމެނޭ ކަން އެމަނިކުފާނު ފާހަގަކުރެއްވިއެވެ.

ރައީސް ޔާމީން އިތުރަށް ވިދާޅުވި، ރައީސް އިބްރާހިމު މުހައްމަދު ސޯލިހުގެ ސަރުކާރުން ފައިސާ ޗާޕުކުރި ކަމަށާ އަދި އެއާއެކު މި ސަރުކާރަށް ކުރީ ސަރުކާރުން ވާރުތަވި ދަރަނީގެ ޖުމްލަ އަދަދަކީ 160 ބިލިއަން ރުފިޔާ ނަމަވެސް ޗާޕުކުރި ފައިސާގެ 75 އިން ސައްތަ ހޭދަކުރަން ލިބުނީ މި ސަރުކާރަށް ކަމަށަ އެހެންކަމުން އެ ދަރަނީގެ ތެރެއިން ބޮޑު އަދަދު ހޭދަކުރީ މި ސަރުކާރުން ކަމަށެވެ.

މީގެ އިތުރުން އެމަނިކުފާނު ވިދާޅުވީ، ބޮޑު އަދަދަކުން ޗާޕުކުރި ފައިސާ ހޭދަކުރަން ރައީސް ޑރ މުހައްމަދު މުއިއްޒުގެ ސަރުކާރަށް ލިބުނު ނަމަވެސް އެ ފައިސާވެސް ފެން ފޮދަކާ ނުލާ ސަރުކާރުގެ ވެރިން ދިރުވާލާފައިވާ ކަމަށާ އެހެންކަމުން ކުރީ ސަރުކާރުގެ ދަރަނީގެ ވާހަކަ މި ސަރުކާރުގެ ވެރިން ދެއްކުން ޖާއިޒު ނޫން ކަމަށް ވެސް ރައީސް ޔާމީން ވިދާޅުވިއެވެ.