ރައީސް އަބްދުﷲ ޔާމީން ވަނީ އެމަނިކުފާނުގެ ޒައާމތުގައި ވެރިކަން ކުރަމުގެ ބެންޗުމާކެއް ޖައްސަވާދެއްވާފައިވާ ކަމަށާ އެ ބެންޗުމާކާ އެއްގޮތަށް މި ސަރުކާރުންވެސް ވެރިކަންކުރުމުން ގައުމަށާ ރައްޔިތުންނަށް ފައިދާ ވާނެ ކަމަށް ޕީޕަލްސް ނެޝަނަލް ފްރޮންޓު (ޕީއެންއެފް)ގެ އިސް ސަފުގައި ހަރަކާތްތެރިވާ މުހައްމަދު އަހުމަދު ވަހީދު (ވައްޑެ) ވިދާޅުވެއްޖެއެވެ.

ޕީއެންއެފް ޖަލްސާއެއްގައި ވާހަކަ ދައްކަވަމުން ވައްޑެ ވިދާޅުވީ ރައީސް މުއިއްޒުގެ ވެރިކަން ދަނީ ވަރަށް ދޯހަޅިކޮށް ކަމަށާ އޭގެ ސަބަބުން ރައީސް މުއިއްޒަށް އިތުބާރުކޮށް އެމަނިކުފާނު ހޮވަން މަސައްކަތްކުރި އެތައް ބަޔަކު މިއަދު މާޔޫސްވެ ނުރުހިފައި ތިބި ކަމަށެވެ.

ވައްޑެ ވިދާޅުވީ ގައުމުގެ ކަންކަން ބޮއްސުން ލާފައިވާއިރު، ވެރިކަން ކުރުމުގެ މިސާލު ރައީސް މުއިއްޒު ރައީސް ޔާމީންގެ އަރިހުން ނެގުން ރަގަޅު ކަމަށެވެ.

އެގޮތުން ރައީސް ޔާމީންގެ ޒައާމަތުގައި 24 ގަޑިއިރު ބޭސް ލިބޭނެ އިންތިޒާމު ހުރިހާ ރަށެއްގައި ހަމަ ޖެއްސުމާ 24 ގަޑިއިރުގެ ކަރަންޓު ހުރިހާ ރަށަކަށް ފޯރުކޮށްދިނުމާ އިގްތިސޯދު ދަރަނިން ނަގާ އަރަންޏަށް ބަދަލުކޮށްދިނުމަކީ ވެރިކަން ކުރުމުގައި ޖެއްސެވި ބެންޗު މާކު ކަމަށާ އެގޮތަށް ރައީސް މުއިއްޒު ވެސް އަދި ދެން ވެސް ވެރިކަމަށް ވަޑައިގަންނަވާ ބޭފުޅުން އަމަލުކުރެއްވުމުން ހުންނާނީ ރަގަޅަށް ކަމަށް ވައްޑެ ވިދާޅުވިއެވެ.

ވައްޑެ ވިދާޅުވީ، މިއަދު ފެންނަމުން ދަނީ މި ސަރުކާރަށް ޕްރޮޖެކްޓުތައް ހިންގަން ނޭނގި ފެއިލްވަމުން ދާ މަންޒަރު ކަމަށެވެ.

އެގޮތުން ބަންކަރިންގެ ޚިދުމަތްވެސް ސަރުކާރުން ފެށި ނަމަވެސް ކުރިއަށް ނުގެންދެވުނުކަން ފާހަގަކުރައްވާ ވައްޑެ ވަނީ އިކޮނޮމިކު މިނިސްޓަރު ސައީދުވެސް ގައުމުގެ އިގްތިސޯދީ ހާލަތު އޮޅުވާނުލައްވާ ރައީސް މުއިއްޒަށް ވިދާޅުވެދެއްވަން ޖެހޭ ކަމަށެވެ.