އިންޓަނޭޝަނަލް ކްރިމިނަލް ކޯޓު (އައިސީސީ) މާ ބޮޑަށް ސިޔާސީވެއްޖެ ކަމަށް ވިދާޅުވެ، މެމްބަރުކަން ދޫކޮށްލައިފިން ކަމަށް ހަންގޭރީގެ ބޮޑުވަޒީރު ވިކްޓަރު އޯބަން ވިދާޅުވެއްޖެ އެވެ.

ހަންގޭރީން އެގޮތަށް ނިންމާފައި ވަނީ އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ އެ ގައުމަށް ވަޑައިގަތުމުގެ ކުޑައިރުކޮޅެއް ކުރިންނެވެ. އައިސީސީން މީގެކުރިން ވަނީ ނަތަންޔާހޫ ހައްޔަރުކުރުމުގެ އަމުރެއް ނެރެފަ އެވެ.

އޯބަން ވަނީ ހަންގޭރީއަކީ އައިސީސީގެ މެމްބަރެއް ނަމަވެސް ނަތަންޔާހޫ ހައްޔަރުކުރުމުގެ އެ އަމުރު ތަންފީޒު ނުކުރާނެ ކަމަށް ވައުދުވެވަޑައިގެންފަ އެވެ.

ހަންގޭރީ އައިސީސީން ވަކިވާން ނިންމި އިރު، އެ ގައުމަކީ އެ ކޯޓް އުފެއްދުމުގައި ހިއްސާވާ ގައުމެކެވެ. އައިސީސީގެ މެންބަރުންގެ ގޮތުގައި މިހާރު 1 125 ގައުމު ހިމެނޭ އިރު، ހަންގޭރީ ވެފައި މި ވަނީ އައިސީސީން ވަކިވާން ނިންމި ޔޫރަޕިއަން ޔުނިއަން އީޔޫ) ގެ ފުރަތަމަ ގައުމަށެވެ.

ހަންގޭރީގެ މި އަމަލާ އެކު އައިސީސީން ވަނީ އެ ނިންމުމާ މެދު ހިތާމަކުރާ ކަމަށް ބުނެފަ އެވެ. އަދި އަދި ނަތަންޔާހޫ ހައްޔަރުކުރުމަށް ނެރެފައިވާ އަމުރަށް މެންބަރު ގައުމެއްގެ ހައިސިއްޔަތުން ހަންގޭރީން ތަބާވާން ޖެހޭނެ ކަމަށް ބުނެފައިވެ އެވެ.

ހަންގޭރީގެ ނިންމުމަށް ސަހްޔޫނީންގެ ވެރިޔާ ނަތަންޔާހޫ މިއަދު ވަނީ ތައުރީފުކޮށް މަރުހަބާ ވެސް ކިޔައިފަ އެވެ.

ދެހާސް ތޭވީސް ވަނަ އަހަރު އޮކްޓޫބަރު މަހުގެ ހަތް ވަނަ ދުވަހު ފަލަސްތީނުގެ ހަނގުރާމަވެރި ޖަމާއަތް، ހަމާސްއިން ސަހްޔޫނީންނަށް ދިން ހަމަލާއާ ގުޅިގެން ސަހްޔޫނީން ފަލަސްތީނުގެ ޣައްޒާގައި ހިންގަމުންދާ ލާއިންސާނީ ޖަރީމާތަކުގެ މައްސަލައިގައި ނަތަންޔާހޫ ހައްޔަރުކުރުމަށް އައިސީސީން އަމުރު ނެރުނީ މިދިޔަ އަހަރު ނޮވެމްބަރު މަހުއެވެ.

ސަހްޔޫނީން ސިފައިން ޣައްޒާއަށް ދެމުންދާ ހަމަލާތަކުގައި 53000 އަށް ވުރެ ގިނަ މީހުން ވަނީ ޝަހީދުވެފަ އެވެ. މިއީ ޣައްޒާ މުޅިން ހުސްކޮށް ބިން ޖަހައިގަތުމަށް ސަހްޔޫނީން ހިންގާ އަމަލެކެވެ.