ނޫމަޑި މައްސަލައިގެ ކޮރަޕްޝަންގެ ހުރިހާ ހިސާބެއް ހުރީ މިނިސްޓަރ އެޓް ދަ ޕްރެޒިޑެންޓްސް އޮފީސް ފޮރ ލީގަލް އެފެއާޒް އަލްއުސްތާޛު އަޙްމަދު ހިޝާމް ވަޖީހްގެ އަތުގައިކަމަށް ރައީސް އަބްދުﷲ ޔާމީން އަބްދުލްގައްޔޫމް ވިދާޅުވެއްޖެއެވެ.

ރައީސް ޔާމީން މިފަދައިން ވިދާޅުވެފައިވަނީ ޕީޕްލަސް ނޭޝަނަލް ފްރަންޓް ޕީއެންއެފްގެ ފްރަންޓް އޮފީސް ޖަލްސާގައި ވާހަކަފުޅު ދައްކަވަމުންނެވެ.

އެގޮތުން ސަރުކާރުގެ ތެރެއިން ހިނގާ ކޮރަޕްޝަންގެ އަމަލުތަކުގެ ހިސާބުތައް ހުރީ ހިޝާމްގެ ބައްޕަ އަދި މޯލްޑިވްސް ޕޯޓްސް ލިމިޓެޑްގެ ކުރީގެ ސީއީއޯ މުހައްމަދު ވަޖީހު އިބްރާހީމްގެ އަތުގައިކަމަށް ރައީސް ޔާމީން ވިދާޅުވިއެވެ.

އަދި ނޫމަޑި މައްސަލައިގެ ކޮރަޕްޝަންގެ ހުރިހާ ހިސާބެއް ހުރީ ހިޝާމްގެ އަތުގައިކަމަށް ވިދާޅުވެ ރައީސް މުއިއްޒަށް ހިޝާމާއި ދެކޮޅަށް ފިޔަވަޅެއް އަޅުއްވަން ނުކެރިގެން އުޅޭ ސަބަބަކީ އެއީ ކަމަށް އެމަނިކުފާނު ފާހަގަ ކުރެއްވިއެވެ.

އެ މައްސަލައިގައި ރައީސް މުއިއްޒު ހައްދަވާފައިވާ ގޯސްތައް ހިޝާމަށް އިނގޭނެކަމަށް ރައީސް ޔާމީން ފާހަގަ ކުރެއްވިއެވެ.

ޕޭޝަންޓް ޑޮކްޓަރ ކޮންފިޑެންޝިއާލިޓީއަކީ އޮންނަ އެއްޗެއްކަމާއި ނަމަވެސް ރާއްޖޭގައި ވަކި ބާވަތެއްގެ ބައްޔެއް ޖެހުން އިތުރުވާނަމަ ޑޮކްޓަރުންވެސް އެ ވާހަކަތައް ދައްކާކަމަށް ރައީސް ޔާމީން ފާހަގަ ކުރެއްވިއެވެ.

އެހެންކަމުން ހިޝާމަށް ލޯޔަރ ކްލަޔަންޓް ކޮންފިޑެންޝިއާލިޓީގެ ފަހަތުގައި ބޮޑު ތަޅު އަޅުވައިގެން ނީނދެވޭނެކަމާއި އެއީ ޖިނާއީ މައްސަލައެއްކަން ފާހަގަކޮށް އެ މައުލޫމާތުތައް ހާމަ ކުރަން ޖެހޭކަމަށް ރައީސް ޔާމީން ވިދާޅުވިއެވެ.