ރައްޔިތުންގެ މަޖިލީސް އިންތިހާބުގައި ވާދަކުރައްވާ ކެންޑިޑޭޓުންގެ މަންދޫބުންނަށްވުމުގެ ފުރުސަތު ހުޅުވާލައިފިއެވެ.
މަޖިލީސް އިންތިހާބުގައި ބޭއްވުމަށް ހަމަޖެހިފައިވާ ދުވަހު ވޯޓުނެގުމާއި ވޯޓުގުނުމުގެ ކަންތައްތައް ހިނގާނުހިނގާ ގޮތް ބެލުމަށް އެ މީހެއްގެ މަސްލަހަތު ހިމެނޭ ކޮންމެ މަރުކަޒަކަށް އެއް މަންދޫބަކު އައްޔަންކުރުމުގެ ފުރުސަތު އިންތިހާބުތަކާ ބެހޭ އާންމު ގަވާއިދުގެ ދަށުން ކޮންމެ ކެންޑިޑޭޓަކަށް ވެސް ލިބިދެއެވެ.
އިލެކްޝަންސް ކޮމިޝަނުން ބުރާސްފަތި ދުވަހު ވަނީ ކެންޑިޑޭޓުންގެ މަންދޫބުންގެ ގޮތުގައި ކުރިމަތިލުމަށް ޝައުގުވެރިވާ ފަރާތްތަކަށް ހުކުރު ދުވަހުގެ 15:00 އިން ފެށިގެން މި މަހުގެ 24 ވާ ހޮނިހިރު ދުވަހުގެ ނިޔަލަށް އެ ފުރުސަތު ހުޅުވާލައިފަވެ.
އީސީއިން ބުނެފައިވާ ގޮތުގައި އީ-މެއިލް މެދުވެރިކޮށް ފޯމު ބަލައިގަތުމުގެ އިތުރުން އިންތިހާބާ ބެހޭ މަރުކަޒު (ދަރުބާރުގެ) ގެ ރިސެޕްޝަނުން ފޯމު ބަލައިގަތުމުގެ އިންތިޒާމު ހަމަޖެހިފައިވާނެ އެވެ.
އެ މަރުކަޒުން ފޯމު ބަލައިގަންނާނީ ފޯމު ހުށަހެޅުމަށް ކަނޑައަޅާފައިވާ މުއްދަތުގެ ތެރޭގައި ކޮންމެ ދުވަހަކު ހެނދުނު 09:00 އިން ފެށިގެން މެންދުރުފަހު 03:00 އާ ހަމައަށެވެ. އަދި ހުކުރު ދުވަހު މެންދުރުފަހު 03:00 އިން ފެށިގެން ހަވީރު 05:00 ހަމަ އަށެވެ.
