ސުޕްރީމް ކޯޓުގެ ދެ ފަނޑިޔާރުންކަމަށްވާ ފަނޑިޔާރު މަހާޒް އަލީ ޒާހިރާއި ފަނޑިޔާރު ޑރ. އަޒްމިރާލްދާ ޒާހިރުގެ މައްޗަށް ޖުޑީޝަލް ސާވިސް ކޮމިޝަނުން ކުރަމުންދާ ތަހުގީގުގެ ފަހު އަޑުއެހުން މާދަމާއަށް ތާވަލްކޮށްފިއެވެ.

އެ ދެ ފަނޑިޔާރުންނަށް މިހާރު ވަނީ މާދަމާ ޖޭއެސްސީއަށް ހާޒިރުވުމަށް އަންގާފައެވެ. ޖޭއެސްސީއަށް ހާޒިރުވުމަށް އަޒްމިރާލްދާއަށް އަންގާފައި ވަނީ މާދަމާ ހެނދުނު 10:00 އަށެވެ. މަހާޒް އަށް އަންގާފައި ވަނީ 12:00 އަށެވެ.

އަޒްމިރަލްދާ އަދި މަހާޒުގެ މައްޗަށް ކުރާ ތުހުމަތަކީ ކްރިމިނަލް ކޯޓުގެ ފަނޑިޔާރުންނަށް ނުފޫޒު ފޯރުވި ކަމަށް ބުނެ ކުރާ ތުހުމަތުތަކެކެވެ. ނަމަވެސް ދެ ފަނޑިޔާރުންވެސް ވަނީ އެކަމަށް އިންކާރުކުރައްވާފައެވެ.

މީގެ އިތުރުން މައްސަލައަކާ ގުޅިގެން ސުޕްރީމް ކޯޓަށް ލިބެންޖެހޭ މުހިންމު ލިޔެކިޔުންތަކެއް ފޯރުކޮށްދިނުމަށް ދެކޮޅު ހަދައިގެން ހައި ކޯޓުގެ ކުރީގެ ރަޖިސްޓްރާ ހުސެއިން މުހައްމަދު ހަނީފު ހާޒިރުކޮށް ޖަވާބުދާރީ ކުރި ތަނުގައި ފަނޑިޔާރު މަހާޒް އަލީ ޒާހިރު އާއި ފަނޑިޔާރު ޑރ. އަޒްމިރަލްދާ ޒާހިރު ތިއްބެވި މައްސަލަ ވެސް ޖޭއެސްސީން އަންނަނީ ސުލޫކީ މައްސަލައެއްގެ ގޮތުގައި ތަހުގީގު ކުރަމުންނެވެ.