20 ވަނަ ރައްޔިތުންގެ މަޖިލީހުގެ އިންތިހާބަށް، ކުރިމަތިލާ ޝަރުތު ހަމަވެފައިވާ ފަރާތްތަކުގެ ނަންތައް ތަރުތީބު ކުރުމަށްޓަކައި ބާއްވާ ގުރުއަތުނެގުން ހުކުރު ދުވަހު މެންދުރުފަހު 2:00 ން ފެށިގެން، ކުރިއަށްގެންދިއުމަށް އިލެކްޝަންސް ކޮމިޝަން (އީސީ)ން ނިންމައިފިއެވެ.

މަޖިލީސް އިންތިހާބަށް ކުރިމަތިލުމަށް ސުންޑި ހަމަވިއިރު 381 ހުށަހެޅުން ލިބިފައިވާ ކަމަށް އީސީން ވަނީ މައުލޫމާތުދީފައެވެ.

އެ ހުށަހެޅުންތަކުގެ ސައްހަކަން ކަށަވަރު ކުރުމުގެ މަސައްކަތްތައް މިހާރު ދަނީ ކުރަމުންނެވެ.

އީސީގެ ނައިބް ރައީސް އިސްމާއީލް ހަބީބް ވިދާޅުވީ ނަންތައް ތަރުތީބު ކުރުމަށްޓަކައި ބާއްވާ ގުރުއަތު ނެގުން އޮންނާނީ އިންތިޚާބާ ބެހޭ މަރުކަޒު (ދަރުބާރުގެ) ގޭގައެވެ.

ހަބީބް ވިދާޅުވިގޮތުގައި ‏ގުރުއަތު ނެގުމަށް ކެންޑިޑޭޓަކަށް ގުރުއަތު ނަގާ ވަގުތަށް، ވަޑައިގަތުމަށް އުޒުރުވެރިވެ ވަޑައިގެންފިނަމަ، ސިޓީ އަކާއެކު ބަދަލުގައި ބޭފުޅަކު ފޮނުއްވުމުން ގުރުއަތު ނެގުމުގައި ބައިވެރި ވެވޭނެ ކަމަށެވެ.

ހަބީބް ވިދާޅުވީ ކެންޑިޑޭޓު ނުވަތަ ބަދަލުގައި ބޭފުޅަކު ހާޒިރު ނުވާނަމަ، ކެންޑިޑޭޓުގެ ބަދަލުގައި ގުރުއަތު ނަގާނީ އިލެކްޝަންސް ކޮމިޝަނުގެ ފަރާތުން ކަމަށެވެ.

އަދި ހާޒިރުވެވަޑައިގަތުމަށް ދަންނަވާފައިވާ ގަޑިއަށް ހާޒިރުވެ ވަޑައިނުގަންނަވާ ބޭފުޅުން ވަޑައިގަންނަވަންދެން ގުރުއަތުލުން ފަސް ނުކުރާނެ ކަމަަށްވެސް ހަބީބް ވަނީ ފާހަގަކުރައްވާފައެވެ.