ސުޕްރީމު ކޯޓުގެ ފަނޑިޔާރުންނާ މެދު ރައީސް ޑރ މުހައްމަދު މުއިއްޒު އަމަލުކުރައްވަމުންދާ ގޮތާ މެދު އުއްތަމަ ފަނޑިޔާރު މުއުތަސިމް އަދުނާނު ބަސްފުޅެއް ވިދާޅުނުވެ ހުންނަވާތީ ރައީސް އަބްދުﷲ ޔާމީން ކަންބޮޑުވުންފާލުކުރައްވައިފިއެވެ.

ރައީސް ޔާމީން މިފަދައިން ވިދާޅުވީ ބުރާސްފަތި ދުވަހުގެރޭ ޕީއެންއެފުން ބޭއްވި ޖަލްސާގައި ވާހަކަފުޅު ދައްކަވަމުންނެވެ. އެމަނިކުފާނު ވިދާޅުވީ ޕާޓީ ބަދަލު ކުރުމުން، އަދި ޕާޓީން ވަކި ކުރުމުން ވެސް މަޖިލިސް މެންބަރުކަން ގެއްލޭގޮތަށް މި ވެރިކަމުގައި ވަނީ ގާނޫނަށް ބަދަލު ގެނައުމުން ސުޕްރީމު ކޯޓަށް ވެއްދި ދުސްތޫރީ މައްސަލަ ހުއްޓުވުމަށް އެ ކޯޓުގެ ފަނޑިޔާރުން ސަސްޕެންޑުކޮށް ރައީސް މުއިއްޒު ޖުޑިޝިއަރީއަށް ފާޅުގައި ނުފޫޒު ފޯރުވަމުންދާ ދިއުމާ މެދު ފަނޑިޔާރުންގެ ބެލެނިވެރި ފަރާތުގެ ގޮތުގައި ހުންނަވާ އުއްތަމަ ފަނޑިޔާރު ބަސްފުޅު ވިދާޅުވާން ޖެހޭނެ ކަމަށެވެ.

ނަމަވެސް ފެންނަމުން ދަނީ މުސާރަ ލިބޭތީ ހަމަ ކޮންމެ ކަމެއް ހެޔޮވަރުވެގެން އުއްތަމަ ފަނޑިޔާރު ހުންނަވާ މަންޒަރު ކަމަށް ރައީސް ޔާމީން ވިދާޅުވިއެވެ.

ވެރިކަމާއި ހަވާލުވެ ވަޑައިގެން އެންމެ ފުރަތަމަ ރައްޔިތުންނާ މުޚާތަބު ކުރައްވައި ދެއްކެވި ވާހަކަފުޅުގައި، މިއަދުން ފެށިގެން ޝަރުއީ ކޯޓުތަކަށް ނުފޫޒު ފޯރުވުން ނިމުނީ ކަމަށް ރައީސް ޑރ. މުހައްމަދު މުއިއްޒު ވިދާޅުވިކަން ފާހަގަކުރައްވާ ރައީސް ޔާމީން ވަނީ އެ ވައުދާ ސީދާ ޚިލާފަށް ރައީސް މުއިއްޒު ކަންކުރައްވަމުންގެންދަވާތީ ނުރުހުން ފާޅުކުރައްވާފައެވެ.

އެގޮތުން އެ މަނިކުފާނު ވިދާޅުވީ އެންމެ އުނދަގޫވާ މައްސަލައަކީ ސަރުކާރުން ކޯޓުތަކަށް ނުފޫޒު ފޯރުވުން ކަމަށެވެ.