މަހާޒު އަލީ ޒާހިރާއި ޑރ. އަޒްމިރަލްދާ ޒާހިރު ފަނޑިޔާރުކަމުން ވަކިކުރުމަށް، ޖުޑީޝަލް ސާވިސް ކޮމިޝަން (ޖޭއެސްސީ)ގެ ތަހުގީގު ކޮމިޓީން ނިންމައިފިއެވެ.

ޖޭއެސްސީން އަޒްމިރަލްދާއާ މަހާޒުގެ މައްޗަށް ކުރަނީ އޭނާގެ ފިރިކަލުން ޑރ. އިސްމާއިލް ލަތީފް މަސާޖު ޕާލާއަކުން ހައްޔަރުކޮށްގެން ކްރިމިނަލް ކޯޓަށް ހާޒިރުކުރުމުން އޭނާ ބަންދުން ދޫކޮށްލަން އެ ކޯޓުގެ ގާޒީންނަށް ނުފޫޒު ފޯރުވި ކަމަށް ބުނާ މައްސަލައިގެ ތުހުމަތެވެ.

މައްސަލައިގެ ފަހު އަޑު އެހުން އެޕްރިލު މަހުގެ 13 ވަނަ ދުވަހު ބާއްވާފައިވާއިރު، ރޭގެ ވަގުތެއްގައި ޖޭއެސްސީގެ ތަހުގީގު ކޮމިޓީގެ ބައްދަލުވުމެއް ބާއްވާފައިވެއެވެ. އެ ބައްދަލުވުމުގައި މައްސަލަައިގައި ކޮމިޓީއިން އެކުލަވާލި ފަހު ރިޕޯޓަށް ޖަވާބުދާރީވުމަށް ފަނޑިޔާރުންނަށް ފޮނުވުމާ މެދު ގޮތެއް ނިންމުން ކުރިއަށް ގެންގޮސްފައިވެއެވެ. އަދި އެ ބައްދަލުވުމުން މަހާޒު އަދި އަޒްމިރަލްދާ ވެސް ވަކިކުރުމަށް ރިޕޯޓްގައި ހިމަނާފައިވާކަމަށް މައުލޫމާތު ލިބިފައިވެއެވެ.

މަހާޒުއާ އަޒްމިރަލްދާ ކުރިމިނަލް ކޯޓުގެ ގާޒީއިންނަށް ނުފޫޒު ފޯރުވި ކަމަށް ބުނާ މައްސަލައިގައި މަހާޒުގެ ފަރާތުން ހުށަހެޅި ދިފާއީ ހެކިންގެ ހެކި ބަސް ވެސް ނަގާފައިނުވާ ކަމަށް މައުލޫމާތު ލިބިފައިވެއެވެ.