ކިރި މަހަށް ލިބެންޖެހޭ ފައިސާ ނުލިބިގެން މަސްވެރިންތަކެއް ކޫއްޑޫގައި މުޒާހަރާ ކުރަން ފަށައިފިއެވެ.
މައުލޫމާތު ލިބިފައިވާ ގޮތުގައި އިހުތިޖާޖު ކުރަމުން ދަނީ މިފްކޯއަށް ކިރި މަހަށް ފައިސާ ނުލިބިގެންނެވެ.
މަސްވެރިން އިހުތިޖާޖުކުރަމުންދާ މަންޒަރު ފެންނަ ވީޑިއޯއެއް 'އެކްސް' ގައި ޕޯސްޓު ކުރައްވާ ރައްޔިތުންގެ މަޖިލީހުގެ ވިލިގިލި ދާއިރާގެ މެމްބަރު ސައުދު ހުސެއިން ވިދާޅުވެފައިވަނީ މަސްވެރިންގެ ކަންބޮޑުވުމަކީ އެ މީހުން ކިރި މަހަަށް ލިބެންޖެހޭ ފައިސާ ނުލިބި ތިން މަހަށް ވުރެ ދިގުލައިގެން ދިއުން ކަމަށެވެ.
ސައުދު ވިދާޅުވީ ސަރުކާރުން މަސްވެރިންނަށް ދޭން ޖެހޭ ފައިސާ ނުދިނުމުގެ ސަބަބުން މަސްވެެރި އާއިލާތަކަށް ބޮޑެތި ދަތިތަކާއި ކުރިމަތިލާން ޖެހިފައިވާ ކަމަށެވެ.
''ސަރުކާރުގެ ޔުޓިލިޓީ ހިދުމަތްތަކާއި އިންޓަނެޓްގެ ވަސީލަތްތަކާއި ބޭންކު ލޯނުތަކަށް ފައިސާ ނުދެއްކި މަސްވެރިންނަށް ދިމާވާ ގޮންޖެހުންތައް ބޮޑު'' ސައުދު ވިދާޅުވިއެވެ.
އޭނާ ވިދާޅުވީ ފަައިސާ ނުލިބުމުގެ ސަބަބުން ދުވަހުން ދުވަހަށް މަސްވެރި އާއިލާތަކަށް ބޭނުންވާ ޒަރޫރީ ކަންކަން ކުރުމަށްވެސް ދަތިވެފައިވާ ކަމަށެވެ. މަސްވެެރިންނަށް ދޭން ޖެހޭ ފައިސާ ވަގުތު ދިނުމަށް ސައުދު ވަނީ ސަރުކާރަށް ގޮވާލައްވާފައެވެ.
މިކަމާ ގުޅިގެން މިނިސްޓްރީގެ ބަހެއް ވެސް އަދި މިނިސްޓަރުގެ ބަހެއް ވެސް ހޯދާލަން ކުރި މަސައްކަތް އަދި ވަނީ ކާމިޔާބުވާ ގޮތް ނުވެފައެވެ
ދާދީ ފަހުން ރައްޔިތުންގެ މަޖިލީހުގައި ފިޝަރީޒް މިނިސްޓަރު އަހުމަދު ޝިޔާމް ވިދާޅުވީ މިހާތަނަށް މަސްވެރިންނަށް 422 މިލިއަން ރުފިޔާ ފައިސާ ދީފައިވާ ކަމަށް ވިދާޅުވިއެވެ. މިހާރު ނުދެވި އޮތީ 190 މިލިއަން ރުފިޔާ ކަމަށް ވިދާޅުވިއެވެ. އެ ފައިސާ ދިނުމަށް ލޯނެއް ހޯދުމުގެ މަސައްކަތް ކުރަމުން އަންނަ ކަމަށް ވެސް މިނިސްޓަރު ވަނީ ވިދާޅުވެފައެވެ.
