ރައީސުލްޖުމްހޫރިއްޔާ އާއި ރައީސުލްޖުމްހޫރިއްޔާގެ ނައިބު ވަކިކުރުމާ ގުޅޭގޮތުން ރައްޔިތުންގެ މަޖިލީހުގެ ޤަވާޢިދަށް ގެނައި އިސްލާޙާއި މަޖިލިހުގެ ޖުމްލަ މެމްބަރުން ގުނުމުގައި ޢަމަލު ކުރާނެ ގޮތާ މެދު ގެނައި އިސްލާޙުތަކާ ގުޅޭ ގޮތުން ބަންޑާރަ ނައިބުގެ އޮފީހުގެ ފަރާތުން ސުޕްރީމް ކޯޓަށް ހުށަހަޅާފައިވާ ދުސްތޫރީ މައްސަލައިގެ ޝަރީއަތް އަވަސްކޮށްފިއެވެ.

ބަންޑާރަ ނައިބު އޮފީހުން ހުށަހަޅާފައިވާ މި މައްސަލައިގެ ޝަރީއަތް ފެށުމަށް ކުރިން ހަމަޖެހިފައި ވަނީ މި މަހުގެ 25 ވަނަ ދުވަހުއެވެ. ނަމަވެސް އަޑުއެހުން އަންނަ ބުދަ ދުވަހަށް އަވަސް ކޮށްފައިވާ ކަމަށް މިއަދު ސްޕްރީމް ކޯޓުން ވަނީ ހާމަކޮށްފައެވެ.

ސްޕްރީމް ކޯޓުން ހާމަކުރި ގޮތުގައި އަޑު އެހުން އޮންނާނީ 21 ފެބްރުއަރީ 2024 ވާ ބުދަ ދުވަހުގެ ހެނދުނު 10:00 ގައެވެ.

ރައީސް އާއި ނައިބު ރައީސް ވަކިކުރުމަށްޓަކައި މަޖިލީހުގެ ޖުމްލަ މެމްބަރުންގެ ތިން ބައިކުޅަ ދެ ބައި މެމްބަރުންގެ ވޯޓު ބޭނުންވެއެވެ. އެއީ 87 މެންބަރުންގެ ތެރެއިން 58 މެމްބަރުންނެވެ. ނަމަވެސް މެންބަރުން ގުނާއިރު ހުސްގޮނޑިތައް ނުގުނާ ގޮތަށް މަޖިލީހުގެ ޤަވާޢިދަށް ވަނީ މިދިޔައަހަރު އިސްލާޙު ގެނެސްފައެވެ.

އެހެންކަމުން މިއީ ދުސްތޫރީ މައްސަލައެއް ގޮތުގައި ބަލައި ބަންޑާރަ ނައިބު އޮފީހުން ވަނީ މި މައްސަލަ ސްޕްރީމް ކޯޓަށް ހުށަހަޅާފައެވެ. އަދި މި އިސްލާޙަށް ޢަމަލުކުރުން ފަސްކުރަން ވަގުތީ ޢަމުރެއް ނެރެދޭން ބަންޑާރަ ނައިބުގެ އޮފީހުގެ ފަރާތުން އެދުމާ ގުޅިގެން މިދިޔަ ބުރާސްފަތި ދުވަހު ކޯޓުން ވަނީ އެގޮތަށް ޢަމުރުކޮށްފައެވެ. ނަމަވެސް މަޖިލީހުގެ މެންބަރުންގެ ވޯޓަކުން ނިންމީ އެ ޢަމުރަށް ޢަމަލު ނުކުރުމަށެވެ.

އެމްޑީޕީން ވަނީ ރައީސް ޑރ. މުހައްމަދު މުޢިއްޒުގެ އިތުބާރު ނެތް ކަމުގެ މައްސަލަ މަޖިލީހަށް ހުށަހެޅުމަށް ނިންމައި، މަޖިލީހަށް ހުށަހަޅަން ޖެހޭ ވަރަށް ސޮއި ވެސް ހަމަކޮށްފައެވެ.