މިއަދުގެ ގައުމުގެ މިނިވަން މުއައްސަސާތަކަކީ ރައީސުލްޖުމްހޫރިއްޔާގެ އަތްޕުޅުގައި ހުރި ތަންތަން ކަމަށް ކުރިގެ ނައިބު ރައީސް ޑރ މުހައްމަދު ޖަމީލު އަހުމަދު ވިދާޅުވެއްޖެއެވެ.

ޑރ ޖަމީލު މިފަދައިން ވިދާޅުވީ، ޗެނަލް13 އިން ގެނެސްދޭ "ވީކެންޑް ވިތު ޑރ. ޖަމީލު" ގެ މި ހަފްތާގެ ޕްރޮގްރާމުގައި ވާހަކަފުޅު ދައްކަވަމުންނެވެ.

އެގޮތުން ޖުޑިޝަލް ސާވިސް ކޮމިޝަނުން ރައީސުލްޖުމްހޫރިއްޔާގެ އިޝާރާތަކަށް ވަކި ބޭފުޅަކު ސުޕްރީމު ކޯޓަށް އައްޔަން ކުރަން އުޅޭކަމުގެ އަޑުތައް ގަދަވެފައިވާ ދަނޑިވަޅުގައި އެކަމަށް އިޝާރާތްކުރައްވާ ޑރ ޖަމީލު ވިދާޅުވީ، ފަނޑިޔާރު މުހައްމަދު ސަލީމުގެ ޝަރުތުތައް ފުރިހަމަ ނުވުމުން އޭނާއަށް ފެތޭ ގޮތަށް ގާނޫނު އަސާސީގައި ބަޔާންކޮށްފައި އޮތްއޮތުމެއް އޭނާއަށް ފެތޭ ގޮތަށް ފަރުމާކޮށް ނިންމުމުން އެނގިގެން ދަނީ އެ މުއައްސަސާތަގެ މިނިވަންކަން ގެއްލިފައިވާ މިންވަރު ކަމަށެވެ.

ޑރ ޖަމީލު ވިދާޅުވީ މިއަދު އެއީ ހަމައެކަނި ޖޭއެސްސީގެ ހާލު ނޫން ކަމަށާ ގައުމުގެ މިނިވަން ހުރިހާ މުއައްސަސާއެއްވެސް ހުރީ ރައީސުލްޖުމްހުރިއްޔާގެ އަތްޕުޅު ތެރެއަށް ލައްވާ އެ މުއައްސަސާތަކުގެ އިންޓަރގްރިޓިއާ މެދު ސުވާލު އުފެދޭ ހިސާބުގައި ކަމަށެވެ.

ޑރ ޖަމީލު ވަނީ މިހާރު ގައުމުގެ ކަންކަން ދަތުރުކުރަމުންދާ މިސްރާބުން ގައުމުގެ މުސްތަގުބަލު ފެންނަނީ އަނދިރިކޮށް ކަމަށް ވިދާޅުވެފައެވެ.