ސުޕްރީމު ކޯޓަށް އައްޔަންކުރާ ފަނޑިޔާރަކަށް، މިހާރުގެ ހައި ކޯޓުގެ ފަނޑިޔާރު މުހައްމަދު ސަލީމުގެ ޝަރުތު ހަމަވަނީ އެންމެ ކަމަކުން ކަމަށާ އެއީ އެމަނިކުފާނުގެ ޝަރީއަތް ލަސްކުރިކުރުމުން ކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.

އެމަނިކުފާނު މި ފަދައިން ވިދާޅުވީ މިދިޔަ ބުރާސްފަތި ދުވަހުގެރޭ ބޭއްވި ޕީއެންއެފްގެ ޖަލްސާގައި ވާހަކަފުޅު ދައްކަވަމުންނެވެ. ރައީސް ޔާމީން ވިދާޅުވީ، ސުޕްރީމު ކޯޓުގެ ފަނޑިޔާރުގެ މަގާމަށް ހައި ކޯޓުގެ ފަނޑިޔާރު މުހައްމަދު ސަލީމު އައްޔަން ކުރަން މަސައްކަތްކުރަނީ އޭނާގެ ޝަރުތު ފުރިހަމަ ނުވާއިރުކަމަށް ވީއިރު ގަވާއިދާ ޚިލާފަށް އެކަން ކުރަނީ އޭގެ ފަހަތުގައި ބައިވަރު ސިއްރުތައް ހުރުމުން ކަމަށެވެ.

އެގޮތުން އެންމެ މުހިއްމު އެއް ކަަމަކީ ނިމިދިޔަ ރިޔާސީ އިންތިހާބުގައި އެމަނިކުފާނަށް ވާދަ ނުކުރެވޭނެހެން ހައިކޯޓުގައި އޮތް އިސްތިއުނާފު މައްސަލަ ލަސްކުރިކުރުން ކަމަށް ރައީސް ޔާމީން ވިދާޅުވިއެވެ.

ފަނޑިޔާރުންގެ ތެރޭ ތިއްބަވާ ބޭފުޅުންގެ ތެރެއިން އެންމެ ނާގާބިލު ބޭފުޅަކީ ސަލީމުކަމަށް ރައީސް ޔާމީން ވިދާޅުވިއެވެ. އަދި ވިދާޅުވި، މައްސަލައަކީ ސުޕްރީމު ކޯޓުގެ ފަނޑިޔާރުކަމަށް ސަލީމު އައްޔަންކުރުން ނޫން ކަމަށާ މައްސަލައަކީ އޮންނަ ނިޒާމުގެ ބޭރުން އެކަން ކުރަން އުޅުން ކަމަށެވެ. އެގޮތުން ކަންކަމަށް ގާބިލު ނޫން ބޭބޭފުޅުން ތަންތަނަށް އައްޔަންކުރުމުން ކަން ވެގެންދާ ގޮތް ވަރަށް ކައިރިން މި ސަރުކާރުގެ ތެރެއިން ފެންނަމުން ދާ ކަމަށާ އެގޮތުން ނިޒާމުގެ ތެރެއިން އޭގެ ނަތީޖާއަކަށް ފެންނަނީ ކަމެއް ނުވެދާ މަންޒަރު ކަމަށް ރައީސް ޔާމީން ވިދާޅުވިއެވެ.