ރައީސް ޔާމީންގެ ދައުރުގައި މަސް ނުކިރުނު ނަމަވެސް އެ އޮޑިއެއްގައި ހުރި މަހަށްވާ ފައިސާ ގަވާއިދުން ދެމުން ގެންދިޔަ ކަމަށް މަސްވެރިން ބުނެފިއެވެ.

އާދިއްތަ ދުވަހުން ފެށިގެން ކޫއްޑޫގައި މަސްވެރިން ދަނީ މެދުކެނޑުމެއްނެތި އިހުތިޖާޖުކުރަމުންނެވެ. މިފްކޯއަށް ކިރި މަހަށް ފައިސާ ނުދޭތާ ތިން މަސްވަރުވެފައިވުމުން މަސްވެރިންވަނީ ދެން އިތުރަށް ވަގުތު ދެވެން ނެތް ކަމަށާ ދޭން ހުރި ފައިސާ ދީ ޚަލާސްކުރުމަށް ގޮވާލާ އިހުތިޖާޖުކުރަމުންނެވެ.

މަސްވެރިން ބުނަމުން ދިޔައީ ސަރުކާރު ގެނައީ ނުހަނު ފޮނި އުއްމީދާއެކު ނަމަވެސް ނިމިދިޔަ ސަރުކާރެކޭ މި ސަރުކާރެކޭ ތަފާތެއް ނެތް ކަމަށެވެ. ނަމަވެސް ރައީށް ޔާމީންގެ ޒައާމަތަކީ މަސްވެރިންނަށް އުފާ ފާގަތިކަން ގެނެސްދިން ފަސް އަހަރު ކަމަށާ އެގޮތުން ކޫއްޑޫއަށަ އަދި އެހެން ތަނަކަށް މަސް ނުކިރި ކިޔު ދެމިގެން ދާނަމަ އެ މަހަކަށް ވާ ފައިސާ ރައީށް ޔާމީންގެ ޒައާމަތުގައި މަސްވެރިންނަށް ދިފައިވާކަމަށް އެ ަމސްވެރިން ބުނެފައިވެއެވެ.

މަސްވެރިންގެ ޕްރެޝަރު ބޮޑުވެ ކޫއްޑޫގެ ހުރިހާ އޮޕަރޭޝަންތަކެއް ވެސް ހުއްޓާލާފައިވާއިރު މަސްވެރިންގެ ޝަކުވާއަކީ ރޯދަ މަސް ގާތްވަމުން އައުމާ އެކު އަތްމަތި ދަތިވެ ގޭގެ ޒަރޫރީ ބޭނުންތައް ނުފުއްދި ތިބެން ޖެހުމެވެ. އެގޮތުން ސަރުކާރުގެ ޔުޓިލިޓީ ހިދުމަތްތަކާއި އިންޓަނެޓްގެ ވަސީލަތްތަކާއި ބޭންކު ލޯނުތަކަށް ފައިސާ ނުދެއްކި މަސްވެރިންނަށް ދިމާވާ ގޮންޖެހުންތައް ބޮޑުވުމަކީ އެވެރިންގެ ނުހަނު ބޮޑު ކަންބޮޑުވުމެކެވެ.

ކޫއްޑޫގެ މުޒާހަރާ ހޫނު ބޮޑުވެ، ށ. އަތޮޅުގައި ހުންނެވި ފިޝަރީޒް މިނިސްޓަރު އަހުމަދު ޝިޔާމް ވަނީކޫއްޑުއަށް ވަޑައިގެން މަސްވެރިންނާ މަޝްވަރާކުރައްވައިފައެވެ. އަދި މިވަގުތު މިފްކޯގެ އެމްޑީ އަހުމަދު ސަމާހުވެސް ކޫއްޑޫގައި ހުރިއިރު ސަމާހުއަށް ވެސް ދަނީ މަސްވެރިން މައިތިރި ނުކުރެވިކަން ފާހަގަކުރެވެއެވެ. މަސްވެރިންގެ ރުޅިގަޑު ފަޅައިގެން ދިއުމުން ސަމާހުވެސް ރުޅި ކޮންޓްރޯލު ނުކުރެވިގެން އުޅޭ މަންޒަރު މަސްވެރިން އެފްބީގައި ކުރަމުްނދާ ލައިވްތަކުން ފެނިގެންދެއެވެ.

މަސްވެރިންނަށް ނުދެވި ގާތްގަނޑަކަށް 298 މިލިއަން ރުފިޔާ އެބަ އުޅެއެވެ. އެ ފައިސާ އަންނަ މާޗު 5، ގެ ކުރިން ދައްކާ ނިމޭނެ ކަމަށް މިނިސްޓަރު ވިދާޅުވިއެވެ.

މި ސަރުކާރު އައި ފަހުން ތިން މަސްވީއިރު، އެއިން ދެ މަސް ދުވަހުގެ ފައިސާ ނުލިބޭ ކަން މަސްވެރިން ފާހަގަ ކުރެ އެވެ. ސަރުކާރުން ބުނާ ގޮތުގައި، ސަރުކާރާ ހަވާލުވި އިރު ވެސް 250 މިލިއަން ރުފިޔާ ބެކްލޮގުގައި ހުއްޓެވެ. މަސްވެރިންނަށް ނުދީ ހުންނަ ފައިސާގެ އަދަދު، މި ފަހުން އަބަދުވެސް 300 މިލިއަނެއްހާ ރުފިޔާގައި އުޅެއެވެ.

ސަރުކާރުގެ މަސް ކުންފުނި، މިފްކޯ އަށް ލޯނެއް ނަގައިގެން ނަމަވެސް މަސްވެރިންނަށް ދޭންޖެހޭ ފައިސާ ދީ، ނިންމަވާނެ ކަމަށް ރައީސް، ޑރ. މުހައްމަދު މުއިއްޒު ވެސް ވަނީ ވިދާޅުވެފައެވެ.

ސެޕްޓެމްބަރު 16, 2023 ގައި ރިޔާސީ އިންތިހާބުގެ ދެވަނަ ބުރާ ދިމާކޮށް މަހުގެ އަގު 25ރ. އަށް ބޮޑުކުރި އެވެ. ނަމަވެސް, މި ސަރުކާރުން ވަނީ ފެބްރުއަރީ 12، 2024 އިން ފެށިގެން އަނެއްކާ ވެސް މަހުގެ އަގު 20ރ. އަށް ކުޑަކޮށްފައެވެ.