ކޮންޓްރެކްޓަރުންނަށް ސަރުކާރުން ދައްކަން ޖެހިފައި އޮތް ބިލުތަކުގެ ޖުމްލަ އަދަދާ ގުޅޭގޮތުން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ހާމަކުރެއްވި މައުލޫމާތާއި އިކޮނޮމިކް މިނިސްޓަރު މުހައްމަދު ސައީދު ހާމަކުރެއްވި މައުލޫމާތުގައި ފުށުއެރުމެއް ހުރިކަން ހާމަވެއްޖެއެވެ.

ރައީސް މުއިއްޒު މިހާރު އަތޮޅުތެރެއަށް ކުރައްވަމުން ގެންދަވާ ދަތުރުފުޅުގެ ތެރެއިން އެމަނިކުފާނު ގެންދަވަނީ "ވާރުތަވި އިގުތިސޯދީ ހާލަތު" ގެ ވާހަކަތައް ހިއްސާކުރައްވަމުންނެވެ. މިއަދު ގދ. ފަރެސްމާތޮޑާގައި ވެސް އޭގެ ބައެއް ވާހަކަތައް ރައީސް ހިއްސާކުރެއްވިއެވެ.

އެގޮތުން އެމަނިކުފާނު ވެރިކަމާ ހަވާލުވެވަޑައިގެންނެވިއިރު، ނުވަ ބިލިއަން ރުފިޔާގެ ޕެންޑިން ބިލްސް އޮތްކަމަށް ހާމަކުރެއްވިއެވެ. ނަމަވެސް ރައީސްގެ މިއަދަދު ޖަނަވަރީ މަހު އިކޮނޮމިކު މިނިސްޓަރު ހާމަކުރެއްވި އަދަދާ ތަފާތެވެ.

އެގޮތުން ރައީސް ހާމަކުރެއްވި ނުވަ ބިލިއަނުގެ އަދަދަކީ މިދިޔަ ޖެނުއަރީ 24, ގައި އިކޮނޮމިކް މިނިސްޓަރު ސައީދު އެކަމާ ގުޅޭ ގޮތުން ހާމަކުރެއްވި އަދަދަށް ވުރެ ދެ ބިލިއަން އިތުރު އަދަދެކެވެ.

ރައީސް މިއަދު ވިދާޅުވި ގޮތުގައި ނުވަ ބިލިއަން ރުފިޔާއަކީ ސަރުކާރުގައި އޮތް 50 އަށް ވުރެ ގިނަ ކުންފުންޏާއި އެކި މިނިސްޓްރީތަކުން ކޮށްފައިވާ މަސައްކަތްތަކަށް ދޭން ޖެހޭ ފައިސާ އެވެ. ކޮންޓްރެކްޓަރުންނަށް ފައިސާ ނުލިބޭތީ އެކަމުގެ ކަންބޮޑުވުން ވިޔަފާރިވެރިން އަބަދުވެސް ފާޅުކުރެއެވެ.

ރާއްޖޭގެ އިގުތިސޯދު ކުރިއަރަމުންދިޔަ ނަމަވެސް ދައުލަތުގެ މާލީ ހާލަތު ވަނީ ވަރަށް ބޮޑަށް ގޯސްވެފައެވެ. އެގޮތުން މަސްވެރިންނަށް ދޭން ޖެހޭ ފައިސާ އާއި ސަރުކާރުގެ މަސައްކަތްތައް ކުރި ކޮންޓްރެކްޓަރުންނަށް ދޭން ޖެހޭ ފައިސާ ނުދީ ގިނަ ދުވަސްތަކެއް ވަނީ ވެފަ އެވެ. އެކަމާ ގުޅިގެން ބައެއް ފަރާތްތަކުން އަންނަނީ އިހުތިޖާޖު ކުރަމުންނެވެ. އަދި އަވަސް އިސްލާހީ ފިޔަވަޅުތަކެއް ނާޅައިފިނަމަ ގައުމު ބަގުރޫޓުވުމާ ދިމާއަށް މިސްރާބު ޖަހާޏެކަމުގެ އިންޒާރު އައިއެމްއެފްއިން ވެސް ވަނީ ދިފައިކަން ފާހަގަކޮށްލެވެއެވެ.