ރައްޔިތުންގެ މަޖިލީހުން ހުސްވެފައިވާ މެންބަރުން ނުލައި މުޅި މަޖިލީހުގެ ޖުމުލަ މެންބަރުންގެ އަދަދު ގުނާ ގޮތަށް ގަވާއިދަށް ގެނައި އިސްލާހާ ގުޅިގެން ބަންޑާރަނައިބުގެ ފަރާތުން ސުޕްރީމް ކޯޓަށް ހުށަހަޅާފައިވާ މައްސަލައިގެ އަޑުއެހުންތައް ސުޕްރީމް ކޯޓުގައި ނިންމާލައިފިއެވެ.

ބުދަ ދުވަހު ބޭއްވި އަޑު އެހުމުގައި ފަނޑިޔާރުންގެ ފަރާތުން ވަނީ ދައުލަތަށް ސުވާލުތަކެއް އަމާޒުކުރައްވާފައެވެ. އެގޮތުން ފަނޑިޔާރު އަޒްމިރަލްދާ ވަނީ ހުށަހަޅާފައިވާ މައްސަލާގައި އެދިފައިވާ ގޮތަށް، ބާތިލްކުރުމަށް އެދުނު އަކުރުތައް ބާތިލްކޮށްފި ނަމަ ދައުލަތުން އެދޭ ހައްލު މި މައްސަލައިގެ ތެރެއިން ލިބޭނެތޯ އައްސަވައިފައެވެ.

ޖަވާބުގައި ދައުލަތުން ހާމަކޮށްފައިވާ ގޮތުގައި މަޖިލީހުން ފަހުން އިސްލާހު ގެނެސްފައި ވިޔަސް، މަޖިލީހުން ޖުމްލަ މެންބަރުންގެ އަދަދު މާނަކުރުމާ މެދު އުފެދިފައިވާ ހިޔާލް ތަފާތުވުމަށް ބަދަލެއް ނާންނަ ކަމަށެވެ. އެހެންވެ މި މައްސަލަ ނިމޭއިރު، މަޖިލީހުން ޖުމްލަ މެންބަރުންގެ އަދަދު ކަނޑައެޅުމުގައި އަމަލުކޮށްފައިވަނީ ގާނޫނުއަސާސީގައި ބަޔާންކޮށްފައިވާ ގޮތަށްތޯ ސުޕްރީމް ކޯޓުން ކަނޑައެޅޭނެ ކަމަށް ބުންޏެވެ. އެހެންވެ، ގަވައިދަށް ފަހުން ފެނައި ބަދަލުން ދައުވާގެ ސީޣާއަށް މާބޮޑު އަސަރެއް ނުކުރާ ކަމަށް ދައުލަތުން ބުންޏެވެ.

މިހާރު ގަވާއިދަށް އިސްލާހު ގެންނަން ޖެހުނީ ކީއްވެގެންތޯ ތަކުރާރުކޮށް ފަނޑިޔާރުން އެއްސެވި އެވެ.

ކޮމެޓީގެ ޔައުމިއްޔާއަށް ހަވާލާދީ ފާތުމަތު ވިދާޅުވީ މަޖިލީހުގެ މަގުސަދަކީ ކުރިއަށް އޮތް ތަނުގައި މުހިންމު ކަމެއް ނިންމަން ޖެހިއްޖެ ހާލަތުގައި ކޯރަމް ހަމަ ކުރުން ކަމަށެވެ. 

"އެބޭފުޅުންނަށް [މަޖިލީހުގެ އާންމު ކޮމެޓީއަށް] މި ފާހަގަ ކުރެވެނީ ކުރިއަށް އޮތް ތަނުގަ، މިސާލަކަށް އަޒުލު ކުރުމުގެ މައްސަލައެއް ހުށަހެޅިފަވީ ނަމަވެސް، ނުވަތަ ގާނޫނުއަސާސީއަށް އިސްލާހު ހުށަހެޅިފަ އޮތް މައްސަލައެއް ކަމުގަ ވިޔަސް އެ އަދަދުތައް [ކޯރަމް] ހަމަނުވުމުގެ އިހްތިމާލް އޮތްކަމަށް ވާތީވެގެން،" ފާތިމަތު ވިދާޅުވި އެވެ.

ނަމަވެސް، 15 އަހަރު ދުވަހު ވަކި ގޮތަކަށް ގާނޫނުއަސާސީ މާނަ ކުރަމުން އައިސް، ކުއްލިއަކަށް އެހެން ގޮތަކަށް މާނަކޮށް ބަދަލުތަކެއް މި ގޮތަށް ގެނެސްފައި ވަނީ ރަގަޅު ނިޔަތެއްގައި ނޫން ކަމަށް ވެސް އޭނާ ވިދާޅުވި އެވެ.

ދައުވާ ހުށަހެޅުމާއި ފަނޑިޔާރުންގެ ސުވާލުތަކަށް މިއަދުގެ ޝަރީއަތަށް ދެ ގަޑިއިރު ހޭދަވި އެވެ. ފަނޑިޔާރުން ވަނީ މަޖިލީހުގެ ގަވައިދަށް ބަދަލު ގެނައި ސަބަބާއި ބަދަލުތަކުގެ ނަތީޖާއާ ގުޅޭ ގޮތުން ގިނަ ސުވާލުތަކެއް ކުރައްވައިފަ އެވެ. މި ސުވާލުތަކަށް ފަހު ފަނޑިޔާރު އަޒްމިރަލްދާ ވިދާޅުވީ ދައުލަތުން ހުށަހެޅުމަށް އަންގާއިވާ ލިޔެކިޔުންތަކަށް ބެލުމަށް ފަހު އިތުރު ކަމެއް ސާފުކުރަން ނެތް ނަމަ ދެން އޮންނާނީ ހުކުމް ކުރުން ކަމަށެވެ. އެކަމަކު އެކަމަށް ވަކި ތާރީހެއް އިއުލާނެއް ނުކުރައްވަ އެވެ.

ސުޕްރީމް ކޯޓުގައި މި މައްސަލައިގެ ރިޔާސަތު ބަލަހައްޓަވަނީ ފަނޑިޔާރު ޑރ. އަޒްމިރަލްދާ ޒާހިރެވެ. ދެން ތިއްބެވީ ފަނޑިޔާރު އައިޝާ ޝުޖޫނާއި، ފަނޑިޔާރު ހުސްނުއްސުއޫދު، ފަނޑިޔާރު މަހާޒު އަލީ ޒާހިރު، އަދި ފަނޑިޔާރު ޑރ. މުހައްމަދު އިބްރާހީމެވެ.