އިންޑިއާގެ ގައުމީ އެއާލައިން "އެއާ އިންޑިއާ" ބޯޓު ތަކުން ދަތުރުކުރުމުގައި ރައްކާތެރިކަމާއި މެދު އިތުރަށް ވިސްނަން ޖެހިއްޖެ ކަމަށް އޭވިއޭޝަން ތަޖުރިބާކާރުން ބުނާ އަޑުތައް ގަދަވާންފަށައިފި އެވެ.

މި އަޑުތައް ގަދަވާން މި ފެށީ އެއާ އިންޑިއާގެ ބޯޓްތަކަށް ޓެކްނިކަލް މައްސަލަތަކެއް ކުރިމަތިވިއިރު މިދިޔަ ބުރާސްފަތި ދުވަހު އެއާ އިންޑިއާގެ ބޯޓެއް ވެއްޓި އެތައް ބަޔަކު ވަނީ މަރުވުމާއި ގުޅިގެން ނެވެ.

އިންޑިއާގެ އަހްމަދުއާބާދުން ފުރައިގެން އިނގިރޭސިވިލާތުގެ ލަންޑަނަށް ދަތުރު ފެށި އެ ބޯޓު ދަތުރު ފެށިތާ އިރުކޮޅެއް ނުވެ، ބޯޓު ވެއްޓި، އެ ބޯޓުން ދަތުރު ކުރި އެންމެ މީހެއް ފިޔަވައި ހުރިހާ އެންމެން ވަނީ މަރުވެފަ އެވެ. އެ ހާދިސާގައި މަރުވި މީހުންގެ އަދަދު ވަނީ މިހާތަނަށް 270 އަށް އަރައިފަ އެވެ.

މީގެ އިތުރުން އެއާ އިންޑިއާގެ އިތުރު ދެ މަތިންދާބޯޓަކަށް ވެސް އިއްޔެ އާއި މިއަދު ވެސް ވަނީ މައްސަލަތަކެއް ކުރިމަތިވެފައި އެވެ. އެގޮތުން މިއަދު މައްސަލަ ކުރިމަތިވީ އެމެރިކާގެ ސެންފްރެންސެސްކޯ އިން ފުރައިގެން އިންޑިއާގެ މުމްބާއީ އަށް ދަތުރު ކުރި އެއާ އިންޑިއާގެ "އޭ1180" ފްލައިޓަށެވެ. މުމްބާއީ އަށް ދަތުރުކުރުމުގެ މަރުހަލާގައި ކޮލްކަތާ އަށް އެ ބޯޓު ޓްރާންސިޓްގައި މަޑުކުރި އެވެ. ބޯޓް ކޮލްކަތާގެ އެއާޕޯޓަށް ޖެއްސީ ރޭ ދަންވަރު 12:45 ގަ އެވެ.

އެއާ އިންޑިއާގެ ދެ ބޯޓަކަށް އިއްޔެ ވެސް މައްސަލަ ކުރިމަތިވި އެވެ. އެންމެ ފުރަތަމަ މައްސަލަ ކުރިމަތިވީ ހޮންކޮންގް އިން ފުރައިގެން އިންޑިއާގެ ވެރިރަށް ނިއުދިއްލީ އަށް ދަތުރު ކުރި ފްލައިޓަށެވެ. އެ ބޯޓް ހޮންކޮންގް އެއާޕޯޓުން ނައްޓާލިތާ ގާތްގަނޑަކަށް ތިން ގަޑިއިރު ފަހުން އަލުން އަނބުރައި އެ އެއާޕޯޓަށް ޖެއްސީ ޓެކްނިކަލް މައްސަލައެއް ކުރިމަތިވުމުންނެވެ.

އިއްޔެ ދެވަނަ މައްސަލައެއް ކުރިމަތިވި އެއާ އިންޑިއާގެ ޑޮމެސްޓިކް ފްލައިޓަކަށެވެ. ނިއުދިއްލީން އިންޑިއާގެ އިރުމަތީ ސަރަހައްދުގެ ސިޓީ ރަންޗީ އަށް އިއްޔެ ދަތުރު ފެށި އެ ބޯޓް ނައްޓާލި ފަހުން ޓެކްނިކަލް މައްސަލައެއް ކުރިމަތިވެ އަލުން އަނބުރާ ދިއްލީ އެއާޕޯޓަށް ޖެއްސި އެވެ.

އެއާ އެއާ އިންޑިއާގެ ބޯޓުތަކުގެ ރައްކާތެރިކަމާއިމެދު ސުވާލު އުފެދިފައިވާއިރު އިންޑިއާގެ އެއާލައިންތަކާއި އެއާޕޯޓްތަކަށް މިދިޔަ އަހަރު އަދި މި އަހަރުވެސް ވަނީ ވަރަށް ގިނަ ބޮމުގެ އިންޒާރު ތައް ވެސް ލިބިފައި އެވެ. އެގޮތުން، ފުރަތަމަ 10 މަސް ދުވަހުގެ ތެރޭގައި ވެސް ގާތްގަނޑަކަށް 1،000 ކޯލާއި މެސެޖު ލިބިފައިވާއިރު، މިއީ 2023 ވަނަ އަހަރާ އަޅާބަލާއިރު، ގާތްގަނޑަކަށް 10 ގުނަ އިތުރު އަދަދެކެވެ.

މި ހުރިހާ ކަމެއް މިހެން ހުރުމުން އެއާ އިންޑިއާގެ ގިނަ މަތިންދާބޯޓުތައް މިވަގުތު ހުރީ ސެކިއުރިޓީ އިންސްޕެކްޝަން އަށް ގްރައުންޑް ކުރެވިފައި އެވެ. އަދި އިންޑިއާ އެއާލައިން އިން ދަތުރު ކުރާ މީހުންގެ ނިސްބަތް ވެސް އަންނަނީ ބޮޑު ތަނުން ދައްވަމުން ނެވެ.

މި ނުރައްކަލާއި އެކު އެ ކުންފުންނަށް ދިމާވާނެ އިގްތިސޯދީ ގެއްލުމުން އަރައިގަތުމަށް އިންޑިއާ އެއާލައިނުން މަސައްކަތް ތަކެއް ކުރާނެ ކަމަށް ބެލެވެ އެެވެ.