ދިވެހި ޒުވާނުންނަށް ޖެހިފައިވާ ތުރާތަކުން ސަލާމަތްކޮށް އެ ޒުވާނުންނަށް ފަހި ފުރުސަތު ހޯދައިދޭނެ ކަމަށް ބުނެ ރައީސް މުހައްމަދު މުއިއްޒުގެ ސަރުކާރުން ގެންގުޅޭ ސިޔާސަތު ފެއިލްވެއްޖެ ކަމަށް ޕީއެންއެފްގެ ސެކެރެޓަރީ ޖެނެރަލް އަދި ޒުވާނުންގެ ކުރިގެ ވަޒީރު މުހައްމަދު މަލީހު ޖަމާލު ވިދާޅުވެއްޖެއެވެ.
މަލީހު މިފަދައިން ވިދާޅުވެފައިވަނީ އެކްސްގައި ކުރެއްވި ޕޯސްޓެއްގައެވެ.
އެގޮތުން ކުރާނެ މަސްއްކަތެއްނެތި ޒުވާނުން ބިކަވެ މުސްތަގުބަލު ގެއްލި މަގުމަތި ވެއްޖެ ކަމަށާ ރައްޔިތުންގެ ޓެކުސް ފައިސާ ސިޔާސީ ވެރިންނަށް ބަހާލުމުން ޤައުމުގެ މިއަދުގެ ވެރިންގެ ނާޤާބިލްކަން ހާމަވާކަމަށް ބުނެ އާންމު ރައްޔިތަކު އެކްސްގައި ކުރި ޕޯސްޓެއް ހިއްސާކުރައްވާ މަލީހު ވިދާޅުވީ ދިވެހި ޒުވާނުންގެ ޝަރަފާއި އިއްޒަތް އަނބުރާ ހޯދާ ދިނުމަށް ވުރެ ބޮޑު ޒިންމާއެއް ސަރުކާރަށް ނެތް ކަމަށެވެ.
އެހެނީ މިއަދު ޒުވާނުން ކަންކަން މަތީ ބިއްޖެހިފައާ ހޮޅު އަށިތަކުގައި ނިދާފައި ތިބޭ ތިބުމަކީ މަސްތުވުން ނޫން ކަމަށާ އެއީ ނަފްސު ހަލާކުވުން ކަމުގައި ވާތީ ކަމަށެވެ. އެ ފަދަ ގޮތަކަށް ޒުވާނުން ފެންނަމުން ދަނީ ޒުވާނުންގެ މައްސަލަތައް ހައްލުކުރުމަށް ގެންގުޅެމުން އައި ސިޔާސަތުތައް ފެއިލްވެ ސަރުކާރުން ޒުވާނުންނާ މެދު އިހުމާލުވެފައިވާތީ ކަމަށް މަލީހު ތުހުމަތު ކުރައްވާފައިވެއެވެ.
ރައީސް މުއިއްޒަކީ ޒުވާނުންނަކީ އެމަނިކުފާނުގެ މެނިފެސްޓޯގެ އެންމެ މުހިއްމުކަމެއް ދީފައިވާ މީހުންކަމަށާ ޒުވާނުން ގައުމުގެ ހުރިހާކަމެއްގަިއ ވެސް ބައިވެރި ކުރާނެކަމަށް ވިދާޅުވި ރައީސެކެވެ. ނަމަވެސް ވެރިކަމަށް ވަޑައިގެން ވަޒީފާތައް ބަހާލާފައިވަނި އިލްމީ ގޮތުން ނޫން ނަމަވެސް ސިޔާސީ ނުފޫޒު ގަދަ ފަރާތްތަކަށެވެ. އެއާއެކު ގިނަ ޒުވާނުންނަށް މިއަދު ވަނީ އަދާ ކުރާނެ ވަޒީފާއެއް ނެތި ގޮތް ހުސްވެ ބެގް ބޮރޯ ނޫނީ ސްޓީލު ކުރަން ޖެހިފައެވެ.
