ސިވެކްގެ ލޭންޑިން ކްރާފްޓެއް ކަމަށްވާ އެލްސީ 308 ބަންޑުން ޖަހާލަން މެދުވެރިވި ސަބަބެއް އޮންނާނެ ކަމުގައި ރައީސް އަބްދުﷲ ޔާމީން އަބްދުލް ގައްޔޫމް ވިދާޅުވެއްޖެއެވެ.

ޕީއެންއެފްގެ ފްރޮންޓް އޮފީހުގައި ބުރާސްފަތި ދުވަހުގެރޭ ކުރިއަށް ގެންދިޔަ ޖަލްސާގައި ވާހަކަފުޅު ދައްކަވަމުން އެމަނިކުފާނު ވިދާޅުވީ، ކަނޑު ދަތުރުފަތުރުގެ މައްސަލަތަކުގައި އެންމެ ބޮޑަށް ސަމާލު ވާނެ ބަޔަކީ އެމްއެންޑީއެފް ކަމުގައި ޤަބޫލުފުޅު ކުރައްވާ ކަމަށާއި، ވީއިރު މިފަދަ ހާދިސާއެއް ދިމާވާން މެދުވެރި ވާން ޖެހޭ ސަބަބެއް އޮންނާނެކަން ގަބޫލު ކުރެވޭ ކަމަށެވެ.

ރައީސް ޔާމީން ވިދާޅުވީ މައުލޫމާތު ލިބިފައި ވާގޮތުގައި މުދާ އުފުލާ މި ލޭންޑިން ކްރާފްޓަކީ ބާވެފައި ވާއެއްޗެއް ކަމަށެވެ. އެހެންކަމުން ރައީސް ޔާމީން ވިދާޅުވީ ހިނގައި ދިޔައީ ހިތާމަވެރި ހާދިސާއެއް ކަމަށާ އެކަމުގައި ސުވާލު އުފެދޭ ކަންކަން އެބަހުރި ކަމަށެވެ.

އެގޮތުން އެމަނިކުފާނު ވަނީ ކަނޑުގެ އުޅަނދުތަކުގެ ސީވާދިނަސް ކޮށް ރެންޑަމްކޮށް އަރާ ބަޔަކީ އެމްއެންޑީއެފަށްވާއިރު މި ލޭންޑިން ކްރާފްޓު އެންމެ ފަހުން ޑްރައި ޑޮކް ކުރީ ކޮން އިރަކުތޯ ސުވާލުކުރައްވާފައެވެ.

އެމަނިކުފާނު ވިދާޅުވީ މިހާދިސާއަކީ ވަރަށްވެސް ހިތާމަވެރި ހާދިސާއަކަށް ވީއިރު މިކަމާ ވަރަށް ބޮޑަށް ކަންބޮޑުވެވަޑައިގަންނަވާ ކަމަށެވެ. އަދި ހަމައެހެންމެ ޤުދުރަތީ ގޮތުން ހާދިސާއެއް މެދުވެރިވާން ވެއްޖެ ނަމަ މެދުވެރި ވާނެ ކަމަށާއި، ނަމަވެސް އިންސާނުންނަށް އޮތްކަމަކީ ދިމާވެދާނެ ހާލަތަކަށް ތައްޔާރުވުން ކަމުގައި އެމަނިކުފާނު ވިދާޅުވިއެވެ.