އިންޓްގްރޭޓެޑް ޓޫރިޒަމް ކޮންސެޕްޓަށް ތަރައްގީކުރި އައްޑޫ ސިޓީ ހަންކެޑެގައި ހަލާލް ޓޫރިޒަމަށް ތަރައްގީކުރަން ފޭދޫ އުތުރު ދާއިރާގެ ޕީއެންސީ މެންބަރު އިސްމާޢިލް ނިޒާރު ދެކޮޅު ކަން ހާމަކުރައްވައިފިއެވެ.
ހަންހެޑެ މައްސަލާގައި ނުރުހުން ފާޅުކޮށް މެންބަރު ނިޒާރު ސޯޝަލް މީޑިއާ ޕޯސްޓެއްގައި ވިދާޅުވީ "ހަލާލު ޓޫރިޒަމް ކޮންސެޕްޓަށް ހަންކެޑެ ތަރައްގީ ކުރަން ތާއީދު ނުކުރާ" ކަމަށާއި "އެކަމާ ކަންބޮޑުވުން ފާޅުކޮށްފައިވާ" ކަމަށެވެ.
ނިޒާރުގެ އިތުރުން ހިތަދޫ މެދު ދާއިރާގެ ޕީއެންސީގެ މެންބަރު އަހްމަދު އަޒާން ނުރުހުން ވެސް ސަރުކާރަށް ވަނީ އަމާޒުވެފަ އެވެ.
އަޒާން ވިދާޅުވެފައި ވަނީ ކުރީސަރުކާރުގެ ނިންމެވުމާއި އެއްގޮތަށް ހަންކެޑެގެ މަޝްރޫ ކުރިއަށް ގެންދަން މި ސަރުކާރުން ނިންމާފައި ވީއިރު ކުއްލިޔަކަށް އެ މަޝްރޫއު އުވާލާ އެެހެން މުޅި ކޮންސެޕްޓް ބަދަލުކޮށްފައިވާކަމަށް އަޒާން ވިދާޅުވި އެވެ.
ސަރުކާރުގެ މި ނިންމުމާ ގުޅިގެން ކުރީގެ އިކޮނޮމިކް މިނިސްޓަރު ފައްޔާޒް އިސްމާއީލް ވެސް ވަނީ ނުރުހުން ފާޅުކުރައްވާފައެވެ. އެގޮތުން މިއީ، އައްޑޫގެ ތަރައްގީއަށް ސަރުކާރުން އަޅާ ބޮޑު ހުރަހެއް ކަމަށް އޭނާ ވަނީ ވިދާޅުވެފަ އެވެ.
ހަލާލު ޓޫރިޒަމަކީ މުސްލިމު ފަތުރުވެރިންގެ ބޭނުންތަކަށް ޚާއްސަކޮށް ހުރިހާ ފަތުރުވެރިންނަށް ވެސް އެކަށީގެންވާ ގޮތަކަށް ފަރުމާކުރެވިފައިވާ ހިދުމަތްތަކެކެވެ.
ހަންކެޑެ ތަރައްގީކުރަން 2005 ވަނަ އަހަރުން ފެށިގެން އެކިއެކި ސަރުކާރުތަކުގައި މަސައްކަތްކޮށްފައި ވެއެވެ. އެކަމަކު މިހާތަނަށް އެ މަޝްރޫއު އޮތީ ކުރިއަށް ނުގޮހެވެ.
މި ސަރުކާރުން ވެސް 15 އޭޕްރީލް 2024ގައި ބަޑިބޭހުގެ ކުޅިވަރުތަކާ އެކު އެ މަޝްރޫއު އަލުން އިފްތިތާހުކުރަން ރަސްމިއްޔާތެއް ބޭއްވި އެވެ. ނަމަވެސް އެ ރަސްމިއްޔާތު ބޭއްވި ފަހުން އަހަރެއްހާ ދުވަސް ފާއިތުވެގެންދާއިރު، ހަންކެޑެ ސަރަހައްދުގައި ހުރި ބައެއް ރުއްގަސް ނެގުން ފިޔަވާ އިތުރު މަސައްކަތެއް ކޮށްފައެއް ނުވެ އެވެ.
