އިލެކްޝަންސް ކޮމިޝަން (އީސީ)ގެ އިތުބާރު ނެތް ކަމުގެ ވޯޓެއް ނަގަންޖެހިދާނެ ކަމުގެ އިންޒާރު، މޯލްޑިވިއަން ޑިމޮކްރެޓިކު ޕާޓީ 0އެމްޑީޕީ)އިން އެ ކޮމިޝަނަށް ދީފިއެވެ.

އެމްޑީޕީގެ ޕީޖީ ގްރޫޕުން ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުގައި މަޖިލީހުގެ ނައިބު ރައީސް އަދި ހޯރަފުށީ ދާއިރާގެ އެ ޕާޓީގެ މެންބަރު އަހުމަދު ސަލީމް ވަނީ މަޖިލިސް އިންތިހާބު ރޯދަ މަހާ ދިމާކޮށް ބާއްވަން އީސީއިން މަސައްކަތްކުރަމުންދާ ދިއުމާ ގުޅޭ ގޮތުން އެ ޕާޓީއިން ފާޅުކުރަމުން އަންނަ ކަންބޮޑުވުން އެގޮތުގައި ދަމަހައްޓާފައެވެ.

އެގޮތުން ރައްޔިތުންގެ މަޖިލީހަށް މެންބަރުން ހޮވުމަށް އަންނަ ރޯދަމަސް ތެރޭ ބާއްވާ އިންތިހާބު ފަސްނުކުރާނަމަ އެ ޕާޓީން އަމަލުކުރާނެ ގޮތަކާ މެދު ވަރަށް ފުންކޮށް ވިސްނާ ކަމަށް ސަލީމް ވިދާޅުވިއެވެ.

ސަލީމް ވިދާޅުވީ ރޯދަމަހު އިންތިހާބެއް ނުބޭއްވޭނެ ކަމަށް ކަނޑައަޅާފައިވާ ބިލެއް މަޖިލީހުގެ ބޮޑު އަޣުލަބިއްޔަތަކުން ފާސްކޮށް ތަސްދީގުކުރަން ފޮނުވާފައިވާއިރު، އެ ބިލު ތަސްދީގު ކުރަން އޮންނަ މުއްދަތު އަންނަ ހަފުތާގެ ބުދަ ދުވަހަށް ހަމަވާނެ ކަމަށެވެ.

އެހެންކަމުން އެ ބިލު ތަސްދީގު ނުކުރައްވާ، ރައީސުލްޖުމްހޫރިއްޔާ މަޖިލީހަށް އަނބުރާ ފޮނުއްވައިފިނަމަ އެ ޕާޓީގެ ވިސްނުމަކީ އަދި އެއަށްވުރެ ވެސް ބޮޑު އަޣުލަބިއްޔަތަކުން އެ ގާނޫނު ހަމަ އެގޮތަށް ފާސްކުރުން ކަމަށްވެސް ސަލީމް ވިދާޅުވިއެވެ.

ސަލީމް އިތުރަށް ވިދާޅުވީ، ބިލް ތަސްދީގު ނުކުރައްވާނަމަ އެމްޑީޕީން ދެން ބަލާނީ އީސީގެ ވިސްނުން ހުރި ނެތްގޮތަކާ މެދު ކަމަށެވެ. އަދި ދެ ފަހަރަކަށް ރައްޔިތުންގެ މަޖިލީހުގެ ބޮޑު އަޣުލަބިއްޔަތަކުން ވަކި ގޮތަކަށް ކަންކުރަން ފާސްކުރީމައި އެއީ ނެތް ކަމެއް ކަމަށް ހަދާފައި އީސީން އިންތިޚާބު ބޭއްވުމުގެ މަސައްކަތް ކުރިއަށްގެންދާ ނަމަ އެކަމުން ދޭހަވަނީ ރައްޔިތުންގެ ބާރު ކެނޑުނީ ކަމަށް ކަމަށް ސަލީމް ވިދާޅުވިއެވެ.

މީގެ އިތުރުން، ރައްޔިތުންގެ ބޭނުންވާ ގޮތް ނޫން ގޮތަކަށް އަމަލުކުރާން ޖެހޭ އެއްވެސް މުއައްސަސާއެއް އޮވެގެން ނުވާނެ ކަމަށާއި ރައްޔިތުންގެ ރޫހާ ދެކޮޅަށް ގައުމުގައި އެއްވެސް ކަމެއް ހިނގަން އެމްޑީޕީން ބޭނުންނުވާ ކަމަށް އޭނާ ވިދާޅުވިއެވެ.

މަޖިލިސް އިންތިހާބު މާޗު 17އަށް ތާވަލުކޮށްފައިވާއިރު، އެ ދުވަސް ދީމާވަނީ ރޯދަމަހުގެ ހަތް ވަނަ ދުވަހާއެވެ.

ރޯދަމަހު އިންތިހާބު ބޭއްވުމުން ވޯޓުގައި ބައިވެރިވާން މީހުންނަށް އުނދަގޫ ވާނެ ކަމަށް ބުނެ މަޖިލީހުން މިމަހުގެ 11ގައި ފާސްކުރި އިސްލާހުގައިވާ ގޮތުގެ މަތީން މަޖިލިސް އިންތިޚާބު ބޭއްވޭނީ ރޯދަމަސް ނިމޭތާ 10 ދުވަސް ފަހުންނެވެ.

ބިލް ތަސްދީގު ނުކުރައްވާތީ، މަޖިލީހުގައި އެމްޑީޕީއާއެކު މަސައްކަތް ކުރާ ދަ ޑިމޮކްރެޓްސްއިން ވަނީ މަޖިލީހަށް ކުއްލި މައްސަލައެއް ހުށަހަޅައިފައެވެ.