ވެލާނާ އިންޓަނޭޝަނަލް އެއާޕޯޓު (ވީއައިއޭ)ގެ އާ ޓާމިނަލް ހުޅުވާ ރޭ ހަވާ އެރުވުމުގެ މަސައްކަތް ކުރުމަށް ހަވާލުކޮށްފައިވަނީ ސަހްޔޫނީންނަށް މާލީ އެހީތެރިކަން ފޯރުކޮށްދޭ ކުންފުންޏަކަށް ކަމަށް ބުނާ ހަބަރެއް ރާއްޖެއެމްވީން ގެނެސްދީފި އެވެ.

މި ހަބަރުގައި ވާ ގޮތުން އާ ޓާމިނަލް ހުޅުވަން ހަވާ އެރުވުމަށް ހަވާލުކޮށްފައި ވަނީ 5 މިލިއަން ޕައުންޑަށެވެ. އަދި ހަވާ އަރުވަން ހަވާލުކޮށްފައި ވަނީ ބަނާނާ ސްޕްލިޓް ކިޔާ ކުންފުންޏަކާ އެވެ. އެ ކުންފުންޏަކީ ލަންޑަންގައި ބޭސްކޮށްފައިވާ ލަގްޒަރީ އިވެންޓް އަދި ލަގްޒަރީ ވެޑިން ޕްލޭނާއެކެވެ. އެ ކުންފުންނަކީ ބައިނަލްއަޤުވާމީ ގޮތުން ހަރަކާތްތެރިވާ ކުންފުންޏެކެވެ.

ރާއްޖެއެމްވީގެ ތުހުމަތު ދޮގުކޮށް އެމްއޭސީއެލް އިން މިރޭ ނެރުނު ބަޔާނެއްގައި ބުނީ އިޒުރޭލަށް އެހީތެރިކަން ފޯރުކޮށްދޭ އެއްވެސް ކުންފުންޏަކާ އެކު އެއްވެސް މުއާމަލާތެއް އެ ކުންފުނިން ނުކުރާނެ ކަމަށެެވެ.

ވީއައިއޭ ހުޅުވުމުގެ އެންމެ ފަހުގެ ތައްޔާރީތައް ވަމުން އަންނައިރު، މި މަހުގެ 26 ގައި ފާހަގަކުރާ މިނިވަން ދުވަހު، އާ ޓާމިނަލް ރަސްމީކޮށް ހުޅުވަން އެމްއޭސީއެލް ވަނީ ނިންމައިފަ އެވެ.

ވެލާނާ އިންޓަނޭޝަނަލް އެއާޕޯޓް ތަރައްގީކުރުމަށް ރައީސް އަބްދުﷲ ޔާމީންގެ ވެރިކަމުގައި މަސައްކަތް ފެށީވެސް ސައުދީ ފަންޑު ފޯ ޑިވަލޮޕްމެންޓް އެސްއެފްޑީ އިން 100 މިލިއަން ޑޮލަރުގެ ލޯނެއް ނަގައިގެންނެވެ.

މި މިޝްރޫއަކީ ރައީސް ޔާމީންގެ ތަރައްގީގެ ތަސައްވުރުގެ ތެރެއިން އެ ކަމުގެ ފުރިހަމަކަން ދައްކުވައިދީ އިގްތިސާދީ އެތައް ފައިދާއަކާ ގުޅިގެންދާނެ ކަމެއްގެ ގޮތުގައިކަން ފާހަގަކޮށްލެވެ އެވެ.