2023 ވަނަ އަހަރުގެ ސެޕްޓެމްބަރު މަހު ބޭއްވި ރިޔާސީ އިންތިޚާބުގެ ކަންކަން ކުރިއަށް ގެންދިޔަ ގޮތާމެދު، ޔޫރަޕިއަން ޔޫނިއަން، (އީޔޫ) ގެ ފަރާތުން އިލެކްޝަންސް ކޮމިޝަން (އީސީ) އަށް ތަޢުރީފުކޮށްފިއެވެ.

ރިޔާސީ އިންތިޚާބުގައި އީޔޫއަށް ފާހަގަކުރެވުނު މުހިންމު ކަންކަމާގުޅޭ، ފައިނަލް ރިޕޯޓު ހުށަހަޅުއްވަމުން، އީޔޫ އިލެކްޝަންސް އޮބްޒަރވޭޝަން މިޝަންގެ ޗީފް އޮބްޒަވަރ ނަޗޯ ސަންޗޭޒް ވިދާޅުވީ، ނިމިދިޔަ ރިޔާސީ އިންތިޚާބުގެ ކަންކަން އިލެކްޝަންސް ކޮމިޝަނުން ކުރިއަށް ގެންގޮސްފައިވަނީ ވަރަށް ފުރިހަމަކޮށް ކަމަށެވެ.

ނަޗޯ ސަންޗޭޒް ވިދާޅުވީ، އިންތިޚާބުތެރޭ އިލެކްޝަންސް ކޮމިޝަނުން މަސައްކަތް ކުރައްވަމުން ގެންދެވީ 4 މެންބަރުންނާއެކު ނަމަވެސް، އިންތިޚާބީ ކަންކަން އިލެކްޝަނުން ކުރިއަށް ގެންދެވީ ވަރަށް ފުރިހަމަކަމާއި، ޕްރޮފެޝަނަލް ކަމާއެކުކަމަށެވެ.

އިންތިޚާބުގެ ދުވަސްވަރު ރާއްޖޭގެ މާޙައުލުގައި މާބޮޑު ހަލަބޮލިކަމެއް ނެތް ކަމަށާއި އަދި ވޯޓުލުމާއި، ވޯޓުގުނުމުގެ ކަންކަންވެސް ކުރިއަށްދިޔައީ ވަރަށް ފުރިހަމަކަމާ އަމާންކަމާއެކުކަމަށް އޭނާ ވިދާޅުވިއެވެ.

ކުރިއަށް ހުރި އިންތިޚާބުތަކުގައި، އިންތިޚާބީ ކަންކަން ރަނގަޅުކުރުމަށް 20 ލަފަޔެއް، އީޔޫގެ އިލެކްޝަންސް އޮބްޒަވޭޝަންގެ ފައިނަލް ރިޕޯޓުގައި ވަނީ ހިމަނާފައެވެ.

އެގޮތުން، ސިޔާސީ ޙައްޤުތައް ހަރުދަނާ ކުރުމަށާއި، ވޯޓު ގަތުން ހުއްޓުވުމަށް ސިވިކް އަދި ވޯޓަރ އެޑިޔުކޭޝަން ހަރުދަނާކުރުމާއި، އިންތިޚާބީ ކެމްޕެއިންތަކުގައި ދައުލަތުގެ މުދާ ޚަރަދުކުރުން ހުއްޓުވުމަށް ލަފާދީފައިވެއެވެ. އަދި ކެމްޕެއިން ފައިނޭންސްގެ ޤަވާޢިދުތަކަށް އިސްލާހުގެނެސް، ޤަވާޢިދުތައް ތަންފީޒްކުރުން އިތުރަށް ހަރުދަނާކުރަންޖެހޭކަމަށް އީޔޫގެ ރިޕޯޓުގައި ބަޔާންކޮށްފައިވެއެވެ.

އަދި އިންތިޚާބާއި ގުޅިގެން ސާބިތުނުހިފޭ ދޮގު މަޢުލޫމާތުތައް ސޯޝަލް މީޑިއާގެ ޒަރިއްޔާއިން ފެތުރުމުގެ އިތުރުން، ބައެއް ނޫސްތަކުންވެސް ދޮގު މަޢުލޫމާތު ފަތުރާކަން ފާހަގަކުރެވިފައިވާކަމަށް އީޔޫގެ ފައިނަލް ރިޕޯޓުގައި ބަޔާންކޮށްފައިވެއެވެ.

ރިޔާސީ އިންތިޚާބު އޮބްޒާވްކުރުމަށް، އީޔޫގެ ވަފުދު މިދިޔަ އަހަރުގެ އޮގަސްޓް 13 އިން ފެށިގެން ރާއްޖޭގައި ވަނީ ހަރަކާތްތެރިވެފައެވެ.

އިންތިޚާބު އޮބްޒަރވްކުރުމަށް އީޔޫގެ ވަފުދެއް، ރާއްޖެ އައިސްފައިވަނީ ދިވެހި ދައުލަތުގެ ދަޢުވަތަކަށް ކަން ވެސް ފާހަގަކޮށްލެވެއެވެ.