މާރިޗު 10ގައި އިންޑިއާ ސިފައިން ރާއްޖެއިން ބާލަން ދެ ގައުމުގެ ދެމެދުގައި ވެފައިވާ އެއްބަސްވުން ހާމަކުރަން ގޮވާލާ، ރައީސް އަބްދުﷲ ޔާމީންގެ ތާއީދާއެކު ހެންވޭރު ދެކުނު ދާއިރާއަށް މަޖިލިސް އިންތިހާބުގައި ވާދަކުރައްވާ ކެންޑިޑޭޓު އިބްރާހިމު މުހައްމަދު (ނިޝާން)ގެ ޗެލެންޖެއް ސަރުކާރަށް އަމާޒުކުރައްވައިފިއެވެ.

ނިޝާން މިފަދައިން ވިދާޅުވީ ދަ ފްރޮންޓު އޮފީހުގައި ބުރާސްފަތި ދުވަހުގެ ރޭ ބޭއްވި ޖަލްސާގައެވެ.

ނިޝަން ވިދާޅުވީ، ރައީސް މުއިއްޒު އިންޑީއާ އާ ދެކޮޅު ކަމަށް ދައްކަނީ ރައްޔިތުން ލަލުގައި އަޅުވާ އަނދުނެއްގެ ގޮތުގައި ކަމަށާ ނަމަވެސް އަޑީގައި އޮތީ ހަމަ އިންޑިއާ ސިފައިން މި ގައުމުގައި ކޮންމެ ވެސް އެއް ޒާތެއްގައި ބޭތިއްބުން ކަމަށެވެ.

އެގޮތުން އިންޑިއާ ސިފައިން ބާލާނެ ކަމަށް ބުނާ ނަމަވެސް ސްކޫލެއްގެ ޔުނިފޯމެއް ލައްވައިގެން ނަމަވެސް އިންޑިއާ ސިފައިން މި ގައުމުގައި ރައީސް މުއިއްޒު ބައިތިއްބާނެ ކަމަށް ނިޝާން ތުހުމަތު ކުރެއްވިއެވެ.

ނިޝާން ސިފަކުރެއްވި ގޮތުގައި ރައީސް މުއިއްޒުއަކީ ދެފުއްކެހެރި ބޭފުޅެކެވެ.

ރައީސް މުއިއްޒުގެ ސިޔާސަތެކޭ، 60 އަހަރުގެ މީހަކު 18 އަހަރުގެ ކުއްޖަކާ ކައިވެނިކުރަން ގެންގުޅޭ ސިޔާސަތެކޭ ތަފާތެއް ނެތް ކަމަށް ވިދާޅުވެ ނިޝާންވަނީ މި ސަރުކާރުގެ ސިޔާސަތަށް ވަރަށް ބޮޑަށް ފާޑުވިދާޅުވެފައެވެ.