މިއަދުގެ ހާލަތު އޮތް ހިސާބަށް ދާން ޖެހުނީ ރައީސް ޑރ މުހައްމަދު މުއިއްޒަށް ވެރިކަން ކުރަން ނޭގުމުން ކަމަށް ގާނޫނީ ވަކީލު އަލްއުސްތާޒް އަލީ ހުސައިން ވިދާޅުވެއްޖެއެވެ.

ރާއްޖޭގެ 60 ވަނަ މިނިވަން ދުވަހުގެ މުނާސަބާގައި ޗެނަލް13 އިން ގެނެސްދިން ކަވަރޭޖުގައި ވާހަކަ ދައްކަވަމުން އަލީ ވިދާޅުވީ ރައީސް މުއިއްޒު އެޅުއްވި ފުރަތަމަ ފިޔަވަޅުވެސް އެޅުއްވީ ކަތިކޮށް ކަމަށެވެ.

އެގޮތުން ހުވާ ކުރުމުގެ ރަސްމިއްޔާތަށް 24 މިލިއަން ރުފިޔާ ހަރަދު ކޮށްގެން ބޭއްވި ޖަލްސާއަކީ އެގޮތަކަށްވެސް ބާއްވަން ޖެހޭ ޖަލްސާއެއް ނޫން ކަމަށާއި ޤައުމު އޮތީ އެއަށްވުރެ މާ ނާޒުކު ދަނޑިވަޅެއްގައި ދަތި ހާލެއްގައި ކަމަށް އަލީ ހުސައިން ވިދާޅުވިއެވެެ.

އަލީ ހުސައިން ވިދާޅުވީ ރައީސް މުއިއްޒު ހުރިހާ މައްސަލައެއް ހައްލު ކުރެވޭނެއޭ ބުނެ ކިޔައިގެން ރައްޔިތުން ކައިރީ އާދޭސްކޮށްގެން މަގާމައި ހަވާލުވި ކަމަށެވެ. މީގެ އިތުރުން އަލީ ހުސައިން ވިދާޅުވީ ރައީސް މުއިއްޒުއަށް މިއަދަކު އިތުރަށް ރައްޔިތުން "ބްލޭމް" ކުރެވޭކަށްވެސް ނެތް ކަމަށެވެ.

ރައީސް އެދުނު ގޮތަށް ރައްޔިތުން ވެރިކަން ދީ، ރައްޔިތުންގެ މަޖިލީހުގެ ސުޕަރ މެޖޯރިޓީ ދިން ކަމަށްވެސް އަލީ ހުސައިން ފާހަގަކުރެއްވިއެވެ.

2023 އައި އިރުގައި އޮތް ބިރުވެރިކަމާއި އެއަށް ވުރެ ބިރުވެރި ހާލަތަކަށް ޤައުމުގެ ހާލަތު ދާން މިޖެހުނީ ނުވަތަ މަޖުބޫރީ ހާލަތެއްގައި އަބަދުވެސް "ނާށިގަނޑު ހިފައިން ސަލާން ޖަހާ" ޤައުމެއްގެ ގޮތުގައި އަޅުގަނޑުމެން ދެމި ތިބެން މި ޖެހެނީ ރައީސް މުއިއްޒަށް މި ޤައުމު ހިންގަން ނޭނގޭތީކަމަށް އަލީ ހުސައިން ވިދާޅުވިއެވެ.