އެންމެން ދާންވީ އެކި ދިމާއަށް ނޫން ކަަމަށާ އެއް ދިމާއަކަށް ކަމަަށް ވަނީ ނަމަ، އެ އެއްދިމާ އޮތީ ދިވަހިރާއްޖޭގެ ޤާނޫނުއަސާސީގެ ޤާނޫންތަކުގައި ލިޔެދީފައި ކަމަށާއި އެ ޤާނޫނު އަސާސީއަށް އެންމެ ފުރަތަމަ ތަބާވާން ޖެހޭނީ ރައީސް ޑރ މުހައްމަދު މުއިއްޒު ކަމަށް ރައީސް އަބްދުﷲ ޔާމީން ވިދާޅުވެއްޖެއެވެ.

ރައީސް ޔާމީން މިފަދައިން ވިދާޅުވީ، އާދިއްތަ ދުވަހުގެރޭ ބޭއްވި ޕީއެންއެފްގެ ފްރޮންޓް އޮފީސް ޖަލްސާގައި ވާހަކަފުޅު ދައްކަވަމުންނެވެ.

ރައީސް ޔާމީން ވިދާޅުވީ މިހާރު އެއް ދިމާލަކަށް ނުދެވިގެން މި އުޅެނީ ޤާނޫނުތަކާއި ޤާނޫނުއަސާސީގެ ބާރު ރައީސް މުއިއްޒު ކަނޑުވާލުމުގެ ސަބަބުން ކަމަށެވެ. އެގޮތުން ގާނޫނުން ބާރުތައް ލިބިދީފައި ހުރި މިނިވަން މުއައްސަސާތަކަށް ވެސް ނުފޫޒު ފޯރުވާ ސަރުކާރުގެ ތެރެއިން ދަނީ ހުތުރު ނަމޫނާ ދައްކަވަމުން ކަމަށްވެސް ރައީސް ޔާމީން ވަނީ ވިދާޅުވެފައެވެ.

ރައީސް މުއިއްޒު ގާނޫނީ އިން ފާރުތަކުގެ ތެރެގައި ނޫޅުމުގެ ސަބަަބުން ދިމާވާ މައްސަލަތައް ފާހަގަކޮށް ރައީސް ޔާމީން ވިދާޅުވީ ކޮރަޕްޝަންގެ މައްސަލައާއި، މިނިވަންކަން ގެއްލިގެން ދިޔައިރު ބެލުނު މައްސަލައާއި ހުރިހާ ހައްގުތަކެއް ގެއްލިގަންދާއިރު ބެލުނު މައްސަލައާއި ރާއްޖެ އިގްތިސާދި ގޮތުން މިހާ އަނަރޫފަވެ ހަލާކުވެގޮސް އަވައްޓެރި ޤައުމަކަށް ގޮސް ސަލާންޖަހަންޖެހި ދެން ދުވަހަކުވެސް އެ ސަލާންޖެހުމުން އަރައި ނުގަންނަ ވަރަށް ގޮސްފައިވާއިރު އެއްވެސް މައްސަލައެއް ހައްލު ކުރެވިފައިނުވާކަމަށެވެ.