އިންޑިއާގެ ގިނަ އަދަދެއްގެ ސިފައިން ޢައްޒާގައި މުސްލިމުންނާއި ދެކޮޅަށް ހަނގުރާމަ ކުރަމުންދާކަން ފާހަގަކުރެވިއްޖެއެވެ.

2023 ވަނަ އަހަރުގެ އޮކްޓޯބަރު މަހުގެ 7 ވަނަ ދުވަހު ހަމާސްއިން އިސްރާއީލަށް ދިން ހަމަލާއާ ގުޅިގެން ޣައްޒާއަށް ޔަހޫދީން ދެމުންދާ ހަމަލާތަކުގައި، އިންޑިއާ ނަސްލުގެ ޔަހޫދީން، ޚާއްޞަކޮށް "ބްނެއި މެނަޝޭ" ގެ މެންބަރުން، އިސްރާއީލުގެ ދިފާޢީ ބާރުތަކުގައި (އައިޑީއެފް) މުހިންމު ދައުރެއް އަދާކުރަމުންދާކަން ފާހަގަކުރެވެއެވެ.

މިއީ އިސްރާއީލުގެ ދިފާއީ މަސައްކަތުގައި ބައިވެރިވެފައިވާ، އެ ޤައުމުގެ ޤާނޫނުތަކުގެ ދަށުން ޚިދުމަތްދެމުންދާ ބަޔެކެވެ. ބްނެއި މެނަޝޭއަކީ އިންޑިއާގެ އިރުއުތުރުގެ ސަރަޙައްދުތަކުގައި، ޚާއްޞަކޮށް މަނިޕޫރު އަދި މިޒޯރާމްގައި ދިރިއުޅޭ ބްނެއި މެނަޝޭއިންނަކީ އިސްރާއީލުގެ ގެއްލިފައިވާ ގަބީލާއެއް ކަމަށްވާ މެނަޝޭގެ ދަރިކޮޅުން އައި ބައެއް ކަމަށް އެ މީހުން ދަޢުވާކުރެއެވެ.

އެ މީހުންގެ ޤަދީމީ ތާރީޚީ ގުޅުންތަކަށް ބިނާކޮށް، ސަހްޔޫނީންގެ "ލޯ އޮފް ރިޓަރން" ގެ ދަށުން އެ ޤައުމަށް ހިޖުރަކުރުމުގެ ހުއްދަ ވަނީ ލިބިފައެވެ. މިހާތަނަށް 5,000 އަށްވުރެ ގިނަ ބްނެއި މެނަޝޭގެ މެންބަރުން އިސްރާއީލަށް ހިޖުރަކޮށް، އެ ޤައުމުގެ މުޖުތަމަޢުގައި ވަނީ އެއްވެފައެވެ.

އިސްރާއީލުގެ ޤާނޫނުތަކުން ލާޒިމުކުރާ ގޮތަށް، އެ ޤައުމުގެ ކޮންމެ ރައްޔިތަކަށް ވެސް އަސްކަރީ ޚިދުމަތް ފުރިހަމަ ކުރަންޖެހެއެވެ. މިގޮތުން، ބްނެއި މެނަޝޭގެ ގިނަ ޒުވާނުން ވެސް އައިޑީއެފްގައި ޚިދުމަތްކުރުމަށް ވަނީ ގުޅިފައެވެ. 2023 ވަނަ އަހަރުގެ އޮކްޓޯބަރު މަހުން ފެށިގެން، ޣައްޒާގެ ހަނގުރާމައިގައި 200 އަށްވުރެ ގިނަ ބްނެއި މެނަޝޭ މެންބަރުން އައިޑީއެފްގައި ޚިދުމަތްކޮށްފައިވެއެވެ.

ބްނެއި މެނަޝޭ މީހުން އިސްރާއީލުގެ އަސްކަރިއްޔާގައި ޚިދުމަތްކުރުމަށް ހިތްވަރު ލިބެނީ އެ މީހުންގެ ދީނީ އަދި ވަޠަނީ ވާޖިބެއްގެ ގޮތުގައެވެ. އިސްރާއީލަކީ އެ މީހުންގެ "ވަޢުދު ކުރެވުނު ބިން" ކަމުގައި އެ މީހުން ދެކޭތީ، އެ ބިމާއި އެ ބިމުގެ ރައްޔިތުން ދިފާޢުކުރުމަކީ އެ މީހުންގެ މައްޗަށް ލާޒިމުވެގެންވާ ކަމެއް ކަމަށް ގަބޫލުކުރެއެވެ.

ނަމަވެސް، އައިޑީއެފްގެ މަޢުލޫމާތު ހިފެހެއްޓުމުގެ ސިޔާސަތުގެ ސަބަބުން، މި ސިފައިންގެ ވަކިވަކި މަސްއޫލިއްޔަތުތަކަކީ ކޮބައިކަން ސާފުކޮށް ބަޔާންކުރުމަކީ ދަތިކަމެކެވެ. އެހެންނަމަވެސް، އެ މީހުން އަދާކުރަނީ އާންމު އަސްކަރީ ވާޖިބުތަކެވެ. މި ބައިވެރިވުމަކީ އިސްރާއީލުގެ މުޖުތަމަޢުގެ ތެރޭގައި އެކިއެކި އަސްލުގެ މީހުން ހިމެނޭކަން ދައްކުވައިދޭ ކަމެކެވެ.