ރާއްޖެ އަދި މާލެ ތެރޭގައިވެސް ރައީސް މުހައްމަދު މުއިއްޒުގެ މި ސަރުކާރަށް އެއްވެސް ތާއީދެއް ނެތް ކަމަށް އަބްދުﷲ ޔާމީން ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ ބުރާސްފަތި ދުވަހުގެ ރޭ ޕީއެންއެފުން ބޭއްވި ޖަލްސާއެއްގައި ވާހަކަފުޅު ދައްކަވަމުންނެވެ.

އެމަނިކުފާނު ވިދާޅުވީ އިންތިހާބެއް "ވިން" ކުރެވޭނީ އެ އިންތިހާބެއް ގަނެގެން ކަމަށެވެ. ރައީސް ޔާމީން މިފަދައިން ވިދާޅުވެފައި މިވަނީ ލޯކަލް ކައުންސިލް އިންތިހާބުވެސް ދާދި ގާތްވެފައިވާ ދަނޑިވަޅެއްގައެވެ.

ރައީސް ޔާމީން ވިދާޅުވީ އެމްޑީޕީގެ ވެރިކަން ގޯސްވެގެން ރައްޔިތުން ބަދަލެއް ގެނެސްދީފައިވާއިރު، ސަރުކާރު ފެށުނުތާ މާގިނަ ދުވަހެއް ނުވަނީސް މި ސަރުކާރު ވަނީ "ރޮކް ބޮޓަމް"އަށް ވެއްޓިފައި ކަމަށެވެ. އޭގެ ސަބަބުން ލޯކަލް ކައުންސިލް އިންތިހާބަކާ ވާދަކޮށްލަން ވެސް ނުކެރިގެން މި ސަރުކާރުން އުޅޭ ކަމަށް ރައީސް ޔާމީން ވަނީ ފާހަގަކޮށްފައެވެ.

ރައީސް ޔާމީން އިތުރަށް ވިދާޅުވީ ޤައުމަށް ވަފާތެރި މީހުންނަކީ ޤައުމަށް ވަނީ ކިިހިނެތްތޯ ބަލާ މީހުުން ކަމަށެވެ. ރައްޔިތުންގެ އަނގަޔާއި އަތާއި ދިމާވާތޯ ބަލާ މީހުންނަކީ ޤައުމަށް ވަފާތެރިވާ މީހުން ކަމުގައި ރައިސް ޔާމީން ފާހަގަކުރެއްވިއެވެ.

މި ސަރުކާރު އައި ފަހުން ކުރަމުން އަންނަނީ ބޮޑެތި ވައްކަން ކަމަށް ރައިސް ޔަމީން ވިދާޅުވިއެވެ. ނަމަވެސް މި މައްސަލަތައް ބެލޭނެ އެއްވެސް ގޮތެއް ނެތް ކަމަށް ރައީސް ޔާމީން ފާހަގަކުރެއްވިއެވެ. ރައީސް ޔާމީން ވިދާޅުވީ މުއައްސަސާތަކުގެ މައްސަލަ ވެސް މިހާރު އެބައޮތް ކަމަށެވެ.