2019 ވަނަ އަހަރު ފުލުހުންނަށް ހުށަހެޅުނު މައްސަލައަކާއި ގުޅިގެން ފުލުހުންގެ ބެލުމުގެ ދަށުގައި ގެންދިޔަ ފައިސާގެ ތެރެއިން 30،000 ޑޮލަރު ގެއްލިފައިވާ މައްސަލައެއް ބަލަން ފަށައިފިއެވެ.
ފުލުހުންގެ އިދާރާއިން ހާމަކޮށްފައިވާ ގޮތުގައި މި މައްސަލަ ފުލުހުންގެ ސަމާލުކަމަށް އައި ހިސާބުން ފެށިގެން ކުރިމިނަލް އިންވެސްޓިގޭޝަން ކޮމާންޑުން ތަހުގީގު ކުރަމުންދާ ކަމަށެވެ.
މީގެ އިތުރުން، "ހަލާކު" ވެފައިވާ ފައިސާތަކެއްވެސް ފެނިފައިވާ ކަމަށާއި ފޮރެންސިކް މެދުވެރިކޮށް މި މައްސަލަވެސް ބަލަމުން އަންނަ ކަމަށްވެސް ފުލުހުންގެ އިދާރާއިން ބުނެފައިވެއެވެ.
ފުލުހުންގެ ބެލުމުގެ ދަށުގައި ހުއްޓާ އެތައް ހާސް ޑޮލަރެއް "ގެއްލި" އެ މައްސަލަ ބަލަމުން އަންނައިރު މިއީ ސީދާ ކޮން މައްސަލައަކާއި ގުޅުން ހުރި ފައިސާތަކެއް ކަމެއް ފުލުހުން ހާމަނުކުރެއެވެ.
ސަރުކާރުގެ އެކި އިދާރާތަކުގެ ތެރެއިން ވައްކަމާއި ކޮރަޕްޝަންގެ ގިނަ މައްސަލަތަކެއް ފެންމަތިވަމުން އަންނަ މި ދުވަސްވަރުގައި ތަހުގީގީ އިދާރާއެއްގެ ތެރެއިން މިހާ ބޮޑު ވައްކަމުގެ މައްސަލައެއް ފެންމަތިވުމަކީ މި ގައުމުގައި އެއްވެސް އިންސާފެއް ނެތް ކަމާއި ގާނޫނާއި އުސޫލުތަކުގެ ދަށުން މައްސަލަތައް ނުބެލި ސަރުކާރުގެ ތެރެއިން އަޅަން ޖެހޭ ފިޔަވަޅުތައް ނާޅާނެ ކަމުގެ ހެއްކެކެވެ.
