8،000 އަށްވުރެ ގިނަ ފަރާތަކަށް ބިންވެރިޔާ ސްކީމްގެ ދަށުން ބިންތަކުގެ ރަޖިސްޓްރީ ހަވާލުކޮށްފިއެވެ.

ގެދޮރުވެރިކަމާއި ބިމާއި އުމްރާނީ ތަރައްގީއާ ބެހޭ ވުޒާރާއިން އާދިއްތަ ދުވަހު އާންމުކުރި ނޫސް ބަޔާނުގައި ހަމަކޮށްފައިވާ ގޮތުގައި ބިންވެރިޔާ ސްކީމްގެ ދަށުން ދޫކުރާ ބިންތަކުގެ އެގްރީމަންޓުގައި ސޮއިކޮށް ރަޖިސްޓްރީ މިހާރު ވަނީ 8،250 ފަރާތަކަށް ހަވާލުކުރެވިފައެވެ.

ނޫސްބަޔާނުގައި ވާ ގޮތުގައި ބިންވެރިޔާ ސްކީމްގެ ދަށުން ބިން ލިބިފައިވާ ކަމުގެ ލިޔުން ހަވާލުކުރެވިފައިވަނީ 118 ފަރާތަކަށެވެ. އަދި ބިން ލިބުނު ކަމުގެ ލިޔުން ހަވާލުނުކޮށް 303 ފަރާތެއްވާކަމަށްވެސް އެ ވުޒާރާއިން ހާމަކޮށްފައިވެއެވެ.

މީގެ އިތުރުން އެކި ސަބަބުތަކާހުރެ ސޮއި ނުކުރެވި 148 ފަރާތެއް އެބަހުރި ކަމަށްވެސް ބަޔާން ކޮށްފައިވެއެވެ. އޭގެ ތެރޭގައި ބިން ދޫކޮށްލަން އެދޭ 16 ފަރާތެއްގެ ސޮޔާއި ނިޔާވުމުގެ ސަބަބުން ސޮއި ނުލިބިހުރި 12 ފަރާތަކާއި އަދި އިތުރަށް ބަލަންޖެހޭ ކަންކަން ހުރުމުގެ ސަބަބުން ސޮއި ނުކުރެވިހުރި 120 ފަރާތެއްވާކަމަށް އެ ވުޒާރާއިން މައުލޫމާތުދީފައިވެއެވެ.

އެގްރީމަންޓުގައި ސޮއިކޮށް ރަޖިސްޓްރީ ހަވާލުކުރުމުގެ މަސައްކަތް 212 ފަރާތަކާއެކީ ކުރަމުންދާކަމަށް އެ ވުޒާރާއިން ވަނީ ބުނެފައެވެ. އެގޮތުން އޭގެތެރެއިން ގިނަ ފަރާތްތަކަށް ސޮއިކުރުމަށް 2 ވަނަ ފުރުސަތު ދެވިފައިވާކަމަށް ވެސް އެ ވުޒާރާއިން ފާހަގަކޮށްފައިވެއެވެ.

ގެދޮރުވެރިކަމާއި ބިމާއި އުމްރާނީ ތަރައްގީއާ ބެހޭ ވުޒާރާއިން އާދިއްތަ ދުވަހު ނެރުނު ނޫސްބަޔާނުގައި ބުނެފައިވަނީ އެ ވުޒާރާއިން ލިޔުން ހަވާލުކުރަން މަސައްކަތްކޮށް ހަވާލުނުކުރެވިވާ ފަރާތްތަކެއްވާކަމަށެވެ. އެހެންނަމަވެސް އަދިވެސް އެ ފަރާތްތަކަށް ގުޅުމުގެ މަސައްކަތްކުރަމުންދާ ކަމަށާއި އެ ފަރާތްތަކަމަށް ގުޅަމުންގެންދާނީ އެ ވުޒާރާގެ ހޮޓްލައިން ނަންބަރު '4004994' އަދި '4004797' އިންކަމަށް އެ ވުޒާރާއިން ވަނީ މައުލޫމާތުދީފައިވެއެވެ.