ކުރީގެ ރައީސް އިބްރާހިމު މުހައްމަދު ސޮލިހުގެ ސަރުކާރުން މާލެ ރައްޔިތުންނަށް ޚާއްސަކޮށް ކަމަށ ްބުނެ ދިން ގޯތިތައް ނުދީ ލަސްކުރަމުްނދާތީއާ މި ސަރުކާރު ތެރެއިން ގޯތި ލިސްޓަށް ބަދަލު ގެނެސް ވަގަށްވެސް ގޯތި ވިއްކަމުންދާތީ އާ އެކު ރައްޔިތުން ނިކުމެ އިހުތިޖާޖުކޮށްފިއެވެ.

މިއަދު ހެނދުނު މާލޭގައި ކުރިއަށް ދިޔަ މި އިހުތިޖާޖުގައި ބައިވެރިން ވަނީ ހައުސިން މިނިސްޓަރީ ހިނގަމުންދާ ދަރުބާރުގެއަށް ވަންނަން މަސައްކަތްކޮށްފައެވެ. ނަމަވެސް ފުލުހުން ވަނީ އެ ސަރަހައްދުގައި ބެރިކޭޑު ޖަހާ ބަންދުކޮށްފައެވެ. އެއާއެކު އެ ސަރަހައްދުގައި ތިބެ ރައްޔިތުން އަޑު އުފުލުމަށް ފަހު ދެން ރައްޔިތުން ވަނީ މާލޭގެ ބައެއް މަގުތަކުގައި އެކި ޝުއޫރުތައް ފާޅުކޮށް ލިޔެފައިވާ ބޯޑުތައް ހިފައިގެން ނުކުމެ އިހުތިޖާޖުކޮށް އަޑު އުފުލާފައެވެ.

މިއަދުގެ އިހުތިޖާޖުގައި ބައިވެރިންވަނީ ފުލުހުންގެ އިކޮނޮމިކް ކްރައިމް ޑިޕާޓްމަންޓްގެ ވެރިޔާ، ރަޖްނީ ޝުއައިބު އިސްތިއުފާ ދިނުމަށް ގޮވާލާފައެވެ. އަދި ރަޖްނީ އާއި އެޗްޑީސީގެ ކުރީ އެމްޑީ ފަޒުލް ރަޝީދުވެސް ހައްޔަރު ކުރުމަށް ގޮވާލާފައިވެސް ވެއެވެ. ހައުސިން މިނިސްޓަރު ޑރ. އަލީ ހައިދަރު އަހުމަދު ފިލީ ކަމަށާއި، ސަރުކާރުގެ އިސް މަގާމުތަކުގައި ތިބި ބޭފުޅުންނަށް އަމާޒުކޮށް އެއީ "ގޯތި ވަގުން" ކަމަށް ބުނެ ވެސް އިހުތިޖާޛުގެ ބައިވެރިން އަޑު އުފުލާފައިވެއެވެ.

ގޯތި މައްސަލައަކީ ވަރަށް ބޮޑު "ޖަރީމާ" އެއް ކަމަށާއި، އެ ތުހުމަތުތައް ކުރެވޭ ފަރާތްތަކުން ހަމައެކަނި އިސްތިއުފާ ދިނަސް ނުފުދޭ ކަމަށް މުޒާހަރާގެ ބައިވެރިން ބުންޏެވެ. މުޒާހަރާގައި ގޮވާލާފައިވަނީ ގޯތި މައްސަލައާ ގުޅުންހުރި ފަރާތްތައް ހައްޔަރު ކުރާށެވެ

ގޯތި މައްސަލައިގައި ސިލްސިލާކޮށް އިހުތިޖާޖުކުރުމަށްވެސް ބައިވެރިން ވަނީ ނިންމާފައެވެ. އެގޮތުން ކޮންމެ އާދިއްތަ އަދި އަންގާރަ ދުވަހެއްގައި ހެނދުނު 9:00 އިން ފެށިގެން 11:00 އަށް އިހުތިޖާޖުކުރުމަށް ވަނީ ނިންމާފައެވެ.