2023 ވަނަ އަހަރު ރިޔާސީ އިންތިހާބަށް ޕީޕީއެމް ޕީއެންސީއިން ނުކުތީ ރައީސް އަބްދުﷲ ޔާމީންގެ މެނިފެސްޓޯއާ ޝިއާރުވެސް ހިފައިގެންނެވެ.

"ދިވެހީންގެރާއްޖެ" ދިވެހިންނަށް ހޯދައިދިނުމަށެވެ. ދިވެހީން އެކަން ހިތުގެ އަޑިން ގަބޫލުކޮށް ޖަޒީރާ ރާއްޖޭގައި ދިރިއުޅުން ނިމުމަކަށް ގެނައީ 2023 ސެޕްޓެމްބަރު 30 ވަނަ ދުވަހުއެވެ.

އެއާއެކު 2023 ނޮވެމްބަރު 17 ވީ ހުކުރު ދުވަހު ހަވީރު ދިވެހީންގެ ރާއްޖޭގެ އޮޑި ކަނޑަށް ބޭލީ ނުހަނު ފަހި ދުވެލީގައި ދިވެހީންގެ ދަތުރު ފެށުމަށެވެ.

އެ ދަތުރަށް 10 މަސްވެގެން ދިޔައިރު ނަމަވެސް ފެންނަނީ ކަނޑުގެ ރާޅު ބާނީ ގަދަވެ އޮޑި ކަނޑަށް ނުކަތައިގެން އުޅޭ މަންޒަރެވެ. ލޯނާ ދަރަނީގެ ބިޔަ ރާޅުތަކުގެ ތެރޭގައި ދިވެހީންގެ މާލިމީއަށް ހުންގާނުގައި ފަރިތަކަމާ އެކު ހިފަހައްޓާ ނުލެވިގެން އުޅޭ މަންޒަރެވެ. ފަޅުވެރިންގެ ނުހަނު ބުރަ މަސައްކަތުންވެސް ހުންގާނު ސީދާކޮށްނުލެވިގެން އުޅޭ މަންޒަރެވެ. ބާރަށް ފޮނު އަރުވާލާ ނުދުއްވިގެން އުޅޭ މަންޒަރެވެ.

ރިޔާސީ އިންތިހާބުގައި ވީ ަވއުދުތަކަކަި ކަދުރު ރުކަށް އެރި މީހާގެ ނަދުރަށްވެއްޖެއެވެ. ފެން ނެތް ބޮޑެތި ކާށިތައް ބިނދެ ރައްޔިތުންނަށް ދެއްކީ ދަޅައެއްކަން މިހާރު ހާމަވާން ފަށައިފިއެވެ.

ތަކެތީގެ އަގު ދުވަހެއް ދުވަހަކަށް އިންތިހާއަށް އުފުލެމުން ދަނީއެވެ. "ރައީސް މީހާގެ އަނގައިން" ޑޮލަރުގެ އަގު ތިރި ކުރިނަމަވެސް ޑޮލަރުގެ އަގު ހުރީ އަތް ނުފޯރާ ފަށުގައެވެ. ސަރުކާރަށް ޚަރަދުތައް މެނޭޖުނުކުރެވުމުން ރައްޔިތުންގެ މުސާރައިން ކުޑަކޮށް އެ ރައްޔިތުން ބިކަ ކުރަނިއެވެ. ކުންފުނިތަކާއި ކަންމަތީ ފިހާރަތައް އިނދަޖެހެނީއެވެ. އޯޓީތައް ލިމިޓްކޮށް ކުންފުނިތަކުން ބަރާބަރަށް ދެމުން އައި ބޯނަސްތައް މުއްދަތެއްނެތި ފަސްކޮށްފިއެވެ.

ކުރީގެ ސަރުކާރުންފެށި މުސާރަ އެއްހަމަ ކުރުމުގެ ސިޔާސަތު ހުއްޓާލައި ސިވިލް ސަރވިސް މުވައްޒަފުންގެ މުސާރަތައް ހަމަހަމަ ކުރާނޭ ދުވަހެއްވެސް އެނގޭނޭ މީހަކު ނެތެވެ. ކަރަންޓާއި ފެންބިލު ހުރީ ދިމާ މައްޗަށެވެ. އާއްމު މީހާއަށް ޝަކުވާ ކުރެވުން ނޫން ގޮތެއް ނެތެވެ.

ވެރިކަމަށް 10 މަސްވީއިރު ފެނިގެންދަނީ ފްލެޓްވެރިން މުޒާހަރާ ކުރާ މަންޒަރާއި، ޓެކްސީ ޑްރައިވަރުންގެ މުޒާހަރާ އާއި، މަސްވެރިން މުޒާހަރާ ކުރާ މަންޒަރާއި، ރޭސްކާރު ދުއްވާ ކުދިންގެ މުޒާހަރާ ކުރާ މަންޒަރާއި ސައިކަލު ޓޯކުރާތީ މުޒާހަރާ ކުރާ މަންޒަރާއި ކަރަންޓު ބިލު ބޮޑުވެގެން ރައްޔިތުން މުޒާހަރާ ކުރާ މަންޒަރާ ސްކޫލުތައް އޭސީކުރަން ބެލެނިވެރިން އަތުން ފައިސާ ނަގާތީ މުޒާހަރާ ކުރާ މަންޒަރާ ވިޔަފާރިވެރިންނަށް ސަރުކާރުން ދޭން ހުރި ފައިސާ ނުދީގެން އެމީހުން މުޒާހަރާ ކުރާ މަންޒަރާ އަގަޔާ އަތާ ދިމާނުވާއިރުވެސް ޖީއެސްޓީ ބޮޑުކުރުމުން ރައްޔިތުން ނުުރހުން ފާޅުކުރާ މަންޒަރާ، ބޭރުގައި ކިަޔވާ ކުދިންނަށް ޑޮލަރު ކޮޅު ނުލިބިގެން މުޒާހަރާ ކުރާ މަންޒަރާ މިހެން ގޮސް ކިޔާފައި ނުކިޔާނެ ކަމެއް ނެތެވެ. ހުސް މުޒާހަރާއެވެ. އަބޫބަކުރު ޗުއިން ގަމް ޗުއިންގަމް ގޮވިހެން މިއަދު މި ގޮވަން ޖެހެނީ މުޒާހަރާ މުޒާހަރާއެވެ.

މުޅި ގައުމުގައި މުޒާހަރާއެވެ. އެކަމަކުވެސް ސަރުކާރު ވަރަށް ކޫލުކަމަށް ވެއެވެ. ވާނީ ވެސް އެހެންތާއެވެ. ސަރުކާރުގެ ވެރިންނަށް ދަތިވާ އުނދަގޫ ވާކަމެއް ނެތް ވިއްޔާއެވެ.

ގައުމުގައި ނަޒަހަރު ހިންގާލި ކޮންމެ ދިމާއަކުން ފެންނަނީ މާޔުސްވެފައި ތިބި ރައްޔިތުންނެވެ. އުއްމީދު ގެއްލި މޮޅިވެރިކަމުގެ ސާލެއް ދެމިފައި އޮތް ގައުމެކެވެ. ބަނަކަމާ އަނދިރިކަމުގެ ތެރެއަށް ގައުމުގެ މުސްތަގުބަލު ދަތުރުކުރާ މަންޒަރެވެ. ދިވެހީންގެ ރާއްޖެ ބީވެ މުޒާހަރާ ރާއްޖެއަކަށް ބަދަލުވެ މުޅި ގައުމުގައި ސަރުކާރުގެ ނާގާބިލު ވާހަކައެވެ.