މިނިވަން މީޑިއާ ނައްތާލުމަށް ސަރުކާރުން ފަހަތުގައި އޮވެގެން ހުށަހެޅި ބިލުގެ މަސައްކަތް ކުރިއަށް ގެންދަނިކޮށް ނޫސްވެރިންގެ އިހުތިޖާޖު ކުރަން ފެށުމުން ބިލު ދިރާސާކުރަން ކަމަށް ބުނެ ދައުރު ނިންމާލައިފިއެވެ.

މީޑިއާތައް ރެގިއުލޭޓްކުރާ ކޮމިޝަނަށް ވަރަށް ބޮޑަށް މީޑިއާތައް ކޮންޓްރޯލްކުރެވޭ ގޮތަށް ތުޅާދޫ ދާއިރާގެ، ސަރުކާރާ ގުޅުން ބޮޑު އަމިއްލަ މެންބަރު، އަބްދުލްހަންނާން އަބޫބަކުރު ހުށަހެޅުއްވި ބިލަށް ބަހުސްކުރަމުން ދިޔަ ވަގުތު ރާއްޖޭގެ ނޫސްވެރިން ވަނީ މަޖިލީހުގައި ގެލެރީގައި ހިމޭން އިހުތިޖާޖެއް ކޮށްފައެވެ. އެގޮތުން "ދައުރު"، "އަދަދު" "މިހާރު" ނޫހުގެ އިތުރުން ޗެނަލް 13 / ތޭރަ އޮންލައިންގެ ނޫސްވެރިންވެސް އެ އިހުތިޖާޖުގައި ބައިވެރިވިއެވެ.

ބިލުގެ ބަހުސް ވަކި ހިސާބަކަށް ދިއުމާ އެކު މަޖިލިސް ރައީސް އަބްދުއްރަހީމު ވަނީ، ބިލަށް ބަހުސްކުރަން ހުރިހާ މެމްބަރުންވެސް ބޭނުންވާކަމަށާ ގިނަ މެމްބަރުން އެ ބިލު ދިރާސާކުރަން ބޭނުންވާކަމަށް ވިދާޅުވާތީ ދިރާސާކުރުމަށް ފުރުސަތު ދީ، މުހިއްމު މަސައްކަތްކުރަން ކަމަށް ބުނެ ދިގު ދަންމާލި ދައުރު ކުރުކޮށް، މަޖިލީހުގެ މި ދައުރު ނިންމާލާފައެވެ.

މިނިވަން މީޑިއާތައް ނެތިކޮށްލާ ބިލު ފަރުމާކޮށްފައި އޮތީ މީޑިއާތައް ސަރުކާރުގެ ބާރުގެ ދަށަށް ގެންނަ ގޮތަށް ބިލެއް މަޖިލީހަށް ހުށަހަޅާފައިވާއިރު، އެކަމުގެ އަޑީގައި އޮތީ ސަރުކާރު ހިންގާ ޕާޓީ، ޕީއެންސީ ކަމަށް ގިނަ ބަޔަކު ތުހުމަތުކުރެއެވެ. ގިނަ ބަޔަކު ގަބޫލުކުރާ ގޮތުގައި މީޑިޔާތައް ސަރުކާރުގެ މުށުތެރެއަށް ؛ާން މަސައްކަތް ފަށާފައިވަނީ ސަރުކާރުން ކުރާ ވައްކަންތަކުގެ ވާހަކަ ބައެއް މީޑިޔާތަކުން ރައްޔިތުންނާ ހަމައަށް ތިލަކޮށްދޭތީ އެވެ.