ޕީޕަލްސް ނެޝަނަލް ފްރަންޓު (ޕީއެންއެފް) އިން ރޭ ބޭއްވި ޖަލްސާ ޗެނެލް 13 އިން ރޭ ދައްކަން ފަށަން އޮތް ވަގުތު އެ ޓީވީގެ ލައިވް ބްރޯޑްކާސްޓު ކަނޑައިލަން، ބްރޯޑްކާސްޓިން ކޮމިޝަނުން އެންގުމަކީ ސަރުކާރުގެ ނުފޫޒާއި ބާރު އޮންނަ ބަޔަކު މީޑިއާ ރެގިއުލޭޓު ކުރާއިރު ކަންވާނެ ގޮތުގެ މިސާލެއް ކަމަށް މޯލްޑިވްސް ޖޯނަލިސްޓް އެސޯސިއޭޝަން (އެމްޖޭއޭ) އިން ބުނެފި އެވެ.

އެ ޖަމިއްޔާއިން މި މައްސަލައާި ގުޅިގެން ނެރެފައިވާ ނޫސްބަޔާނެއްގައި ބުނެފައިވަނީ މީޑިއާ ރެގިއުލޭޓު ކުރާ ކޮމިޝަންތަކުން އަމިއްލައަށް އިސްނަގައިގެން މީޑިއާތަކުގެ މައްސަލަ ބެލުމަކީ ރަނގަޅު އުސޫލެއް ނޫން ކަމަށެވެ. އަދި އެގޮތަށް މައްސަލަ ބަލާނަމަ އިންސާފުގެ ހަމައިން ބޭރުވެ ނާޖާއިޒު ނުފޫޒަށް ޖާގަލިބޭ ކަމަށެވެ.

މި އަހަރުގެ ޖެނުއަރީގައި ބަލަން ފެށި މައްސަލައެއް، މި މަހު 11 ވަނަ ދުވަހު ނިންމައި ރޭގެ 8:00 އިން 9:00 އަށް ޗެނެލް 13 ގެ ލައިވް ބްރޯޑްކާސްޓިން ކަނޑައިލަން އެންގިއިރު، ޕީއެންއެފްގެ ޖަލްސާ ލައިވް ކުރާނޭކަން ޗެނެލް 13 އިން މިމަހުގެ 9، ގައި އާންމުކޮށް އިއުލާނު ކޮށްފައިވެއެވެ.

ނަމަވެސް ޕީއެންއެފްގެ ޖަލްސާ ރޭ ޗެނެލް 13 އިން ލައިވް ކުރަން ނިންމާފައިވާކަން އެނގިފައި ނުވާ ކަމަށް ބްރޯޑްކޮމްއިން ބުނެފައިވާ ކަމަށް އެ ނޫސް ބަޔާނުގައި ބުނެފައިވެއެވެ. އަދި މިއީ އިއްތިފާގަކުން ދިމާވެފައިވާ ކަމެއް ކަމުގައިވެސް ބްރޯޑްކޮމް އިން ބުނެފައިވެއެވެ.

މީގެ އިތުރުން، މައްސަލައިގެ ޓައިމްލައިނަށް ބަލާއިރު ސިޔާސީ ޕާޓީއެއްގެ އެއްވުމެއް ވަގުތުން ދުރަށް ދެއްކުމަށް ތާވަލު ކޮށްފައި ވަނިކޮށް އެ ވަގުތާ ދިމާވާގޮތަށް އެ ޗެނެލްގެ ބްރޯޑްކާސްޓު ހުއްޓައިލަން ބްރޯޑްކޮމްއިން އެންގި އެންގުމަކީ ވަކި މަގުސަދެއް ހާސިލު ކުރުމަށް ނުފޫޒެއްގެ ތެރެއިން ކޮށްފައިވާ ކަމެއް ކަމަށް ބެލުމުގެ ޖާގަ އޮތް ކަމަށް ގަބޫލު ކުރެވޭ ކަމެއް ކަމަށް އެމްޖޭއޭގެ ނޫސް ބަޔާނުގައި ފާހަގަކޮށްފައިވެއެވެ.

އެހެންކަމުން މިހާރު މަޖިލީހަށް ވައްދާފައިވާ "ސަރުކާރުން މީޑިއާ ކޮންޓްރޯލް" ކުރުމުގެ ބިލު ފާސްވެއްޖެ ނަމަ މީޑިއާތަކާއި ނޫސްތައް ބަންދު ކުރުމާއި ނޫސްތަކުގެ ކޮންޓެންޓް ކޮންޓްރޯލް ކުރުމުގެ ނުރައްކާތެރި ސަގާފަތެއް ފެށިދާނެ ކަމަށާއި މި ބިލު އަނބުރާ ގެންދިޔުމަށް މި ޖަމިއްޔާއިން ގޮވާލާފައިވެއެވެ.