ރައްޔިތުންގެ މަޖިލީހުގެ ރުހުން ނެތް ވަޒީރުން ތިއްބަވައިގެން ސަރުކާރުން ދަނީ ނަހަމަ ގޮތުގައި ބާރުގެ ބޭނުންކޮށް، ކުރިއަށް އޮތް ރައްޔިތުންގެ މަޖިލީހުގެ އިންތިހާބަށް ނުފޫޒު ފޯރުވަމުން ކަމަށް އިދިކޮޅު މައި ޕާޓީ މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އިން ތުހުމަތުކޮށްފިއެވެ.

މިފަދަައިން ވިދާޅުވެފައިވަނީ އެމްޑީޕީގެ މަޖިލިސް އިންތިހާބުގެ ކެމްޕެއިން ސްޕޯކްސްޕާސަން އަހުމަދު އީސާ މިއަދު ނޫސްވެރިންގެ ބައްދަލުވުމެއްގައި އެވެ.

އެގޮތުން އީސަ ވިދާޅުވީ ސަރުކާރުގެ ފަރާތުން އެ ޕާޓީ ކަންބޮޑުވާ އެތަކެއް ކަމެއް މިހާރު ފެންނަން ފަށާފައިވާ ކަމަށާއި އެ ކަންކަމާ މެދު ރާއްޖޭގެ ރައްޔިތުން ވިސްނާވަޑައިގަތުމަށް އެދޭ ކަމަށެވެ.

އެގޮތުން"ދޮގު ހެދުމާއި އޮޅުވާލުން ހައްދުފަހަނައަޅާފައި" ވާ ކަމަށް އޭނާ ވަނީ ފާހަގަކުރައްވާފައެވެ.

އޭގެއިތުރުންވެސް އޭނާ ވިދާޅުވީ ކުރިއަށް އޮތް މަޖިލިސް އިންތިހާބު ކާމިޔާބު ކުރުމަށް ސަރުކާރުން ނަހަމަ ނުފޫޒު ފޯރުވަމުންދާ ކަމަށެވެ.