މީޑިޔާ ކޮންޓްރޯލް ބިލް މަޖިލީހަށް ބަލައިގަނެ ކޮމިޓީއަށް ފޮޮނުވުމާއި ގުޅިގެން ރައީސް އޮފީސް ކައިރީ ނޫސްވެރިން އިހުތިޖާޖު ކުރުމަށްފަހު ރިޔާސީ ގަނޑުވަރު، މުލިއާގެ ކައިރީ އަޑު އުފުލަން ފަށައިފިއެވެ.

ނޫސްވެރިން ދަނީ މި ބިލު މަޖިލީހުން ބޭރުކުރުމަށް ގޮވާލަމުންނެވެ. އަދި ރައީސް މުއިއްޒު ނޫސްވެރިންނާއި ބައްދަލުކުރެއްވުމަށްވެސް އެދި ނޫސްވެރިން ދަނީ ގޮވާލާ އަޑު އުފުލަމުންނެވެ.

އިހުތިޖާޖުކުރި ނޫސްވެރިން ރައީސް އޮފީސް ކައިރީގައި ތިއްބައި ފުލުހުން ހުރަސްއަޅާ، ބައެއް ނޫސްވެރިން ހައްޔަރުވެސް ކުރިއެވެ. އޭގެތެރޭގައި މޯލްޑިވްސް ޖާނަލިސްޓް އެސޯސިއޭޝަން އަދި އެމްއެމްސީގެ ހިންގާ ކޮމިޓީގެ މެންބަރުންގެ ގޮތުގައި ހިމެނޭ 'ދައުރު' ނޫހުގެ ބައެއް ނޫސްވެރިންނާއި 'އަދަދު' ނޫހުގެ ނޫސްވެރިންގެ އިތުރުން މީޑިއާ ރެގިއުލޭޓެ ނުކުރެވޭނެ ކަމަށާއި ބިލް ބޭރުކޮށްލަން ގޮވާލި ބައެއް ނޫސްވެރިން ހިމެނެެވެ.

ހައްޔަރު ކުރި ނޫސްވެރިން މިހާރު ވަނީ ގާނޫނީ އިންޒާރު ދިނުމަށްފަހު ދޫކޮށްލާފައެވެ.

ތުޅާދޫ ދާއިރާގެ އަމިއްލަ މެންބަރު މަޖިލީހަށް ހުށަހެޅި މީޑިއާ ބިލުގައި ނޫސްވެރިންނާއި ނޫސް އިދާރާތަކަށް ބޮޑެތި އަދަބުތައް ދެވޭގޮތަށް އޮތުމުގެ އިތުރުން ނޫސްތަކުގެ ލައިސަންސް ހިފަހައްޓައި ނޫސް އިދާރާ ބަންދު ކުރުމުގެ ބާރު ކޮމިޝަނަށް ދީފައި ވެއެވެ.

ދައުރުން ބޭރުން ބޭއްވި ޖަލްސާގައި މި ބިލު ބަލައިގަނެ ކޮމިޓީއަށް ފޮނުވާފައިވަނީ 49 މެންބަރުންގެ ވޯޓާއެކުއެވެ. މި ބިލު ބޭރުކޮށްލުމަށް ވޯޓު ދީފައިވަނީ 12 މެމްބަރުންނެވެ.

ބައެއް މެމްބަރުން ވޯޓުގައި ބައިވެރިވެވަޑައެއް ނުގަންނަވައެވެ.