ސަރުކާރުގެ ފުރިހަމަ ތާއީދާއި އެކު ބ.ތުޅާދޫ މަޖިލިސް މެންބަރު އަބްދުލްހަންނާން ލައްވާ ހުށަހަޅާފައިވާ މީޑިޔާ ކޮންޓްރޯލް ބިލާއި ގުޅުން ހުރި ނޫސްވެރިންގެ ކަންބޮޑުވުންތައް ފާޅުކުރުމަށް ބައްދަލުކޮށްދެއްވުމަށް މޯލްޑިވްސް ޖާނަލިސްޓް އެސޯސިއޭޝަނުން މުއިއްޒަށް ގޮވާލާފިއެވެ.

މި މައްސަލައާއި ގުޅިގެން ރައްޔިތުންގެ މަޖިލީހާއި މުލިއާގެ ކުރިމަތީގައި ނޫސްވެރިން ކުރަމުންދިޔަ މުޒާހަރާގައި ވާހަކަދައްކަވަމުން އެމްޖޭއޭގެ ކުރީގެ ރައީސް އަހްމަދު ޒާހިރު ވިދާޅުވީ ރައީސް އޮފީހުގެ ކޮމިއުނިކޭޝަން މިނިސްޓަރު ރައީސް ނޫސްވެރިންނާއި ބައްދަލުކުރައްވާނެ ކަމަށް ވިދާޅުވި ކަމަށާއި ނަމަވެސް އޭގެ ފަހުން މުއިއްޒު މާލެއިން ބޭރަށް ދެ ދަތުރު ކޮށްފައިވާ ކަމަށާއި މީޑިއާ ބޭފުޅުންނާއި ބައްދަލުކުރާނެ ވަގުތެއް މުއިއްޒަށް ނެތް ކަމަށެވެ.

މީގެ އިތުރުން، ނޫސްވެރިން މުޒާހަރާ ކުރާތީ ޖަލްސާ ކުރުކޮށްލާ ނިންމިކަމަށް އިއުލާންކޮށް ނޫސްވެރިންނަށް އޮޅުވާލާ "ވަލުދޮރާށިން" ބިލު އަނެއްކާވެސް ވައްދާ ބިލަށް ބަހުސް ކުރުމަށް ޖަލްސާ ކުރިޔަށް ގެންގޮސްފައިވާ ކަމަށް ޒާހިރު ފާހަގަކުރެއްވިއެވެ.

މި ބިލާއި ގުޅިގެން ނޫސްވެރިންނާއި މީޑިއާ ބޭފުޅުންގެ ހުރި ކަންބޮޑުވުންތައް ފާޅުކުރުމަށް އެ ބޭފުޅުންނާއި ބައްދަލުކުރުމަށް ވަރަށް އާދޭހާއި އެކު ދަންނަވާ ކަމަށް ޒާހިރު ވަނީ އިލްތިމާސްކޮށްފައެވެ.

މިއާއި އެކު މީޑިއާތައް ރެގިއުލޭޓް ކުރަން ޖެހޭނީ ސަރުކާރުން ނޫން ކަމަށާއި މީޑިއާގެ ފަރާތްތަކުން ކަމަށް ޒާހިރު ވަނީ ވިދާޅުވެފައެވެ. ސަރުކާރުން މިކަން ކުރައްވާނަމަ އެއީ ސަރުކާރުން މީޑިއާތަކުގެ މިނިވަންކަމަށް އަރައިގަނެ، މިނިވަން ނޫސްވެރިކަމަށް އެޅުވޭ ތަޅެއް ކަމަށް ނޫސްވެރިން ވަނީ ގޮވާލާފައެވެ.