ސަމުގާއަކީ ކަނޑުދަތުރުކުރާ މީހުން މިޞްރާބު ބަލާއެއްޗެވެ. ދަނޑިއަކީ މިޞްރާބެކެވެ. ސަމުގާ މަސައްކަތް ކުރަނީ ދަގަތްފާނުގެ ބާރުގައެވެ. އަސްލުފަށަނީ އުތުރުންނެވެ. އުތުރަކީ ގަހާއެވެ. ދެކުނަކީ ކާލިއެވެ. އިރު މައްޗަކީ އަރާމުރިނގެވެ. ހުޅަގަކީ އޮއްސޭ މުރިނގެވެ. ސަމުގާގެ ގަހާއިން ކާއްޔަށް ދަމައިލެވޭ ޚިޔާލީ ރޮނގެއްގެ އިރުމަައްޗަކީ "އީރާނު" ފަޅިއެވެ. ހުޅަގަކީ "އަސްތަމާނު" ފަޅިއެވެ. މައިގަނޑު ގޮތެއްގައި ސަމުގާ ބަހާފައިވަނީ ހަތަރުބަޔަށެވެ. އެއީ އިރުއުތުރު، އިރުދެކުނު، ހުޅަގުދެކުނު، އަދި ހުޅަގުއުތުރެވެ.

ސަމުގާގެ ވާހަކަ މި ދައްކަނީ ކީއްވެބާއޭ ތިޔަ ބޭފުޅުން ހިތަށް އަރާފާނެއެވެ. މިއުޅެނީ ބަޔަކު ގައުމުގެ މިސްރާބު ހަމަމަގަށް އަޅުވަން އުޅޭތީއެވެ.

ގައުމުގެ މިސްރާބު ހަމަމަގަށް އަޅުވަން ނުކުމެ އެކަމަކު މތިބީ އެކަން ވާވަރު ބަޔަކުތޯ އެބަބަލަން ޖެހޭ އެހެން ނޫންތޯއެވެ؟ އެގޮތުން މަޖިލިސް ކެމްެޕެއިނަށް ސަމުގާއެއް ހިފައިގެން ރާއްޖޭގެ މިސްރާބު ކަތިވެގެން ދާތީ މިސްރާބު ހަމަމަގަށް އަޅުވަން ނުކުމެ މިއުޅެނީ މީގެ ފަސް އަހަރު ކުރިން ގައުމުގެ ހުންގާނާ ހަވާލުވެ، ގައުމުގެ މިސްރާބު ފާލުން ނައްޓުވާލި މީހުންނެވެ. މިހާ ހިސާބުން ދެން ހިނި ނޫން އެއްޗެއް ނާންނާނެ ނޫންތޯއެވެ.

އާދެ މަޖިލިސް އިންތިހާބުގެ ކެމްޕެއިން އިފްތިތާހުކޮށް ސަމުގާއެއް ކުރަހައިގެން މި ގައުމު ސަލާމަތްކުރަން ނުކުތީކަމަށް ބުނެ ބަޔަކު ލައްވާ ޕާޓީ ދޫކޮށްނުދާނެ ކަމަށް ﷲ ގަންދީ ހުވާ ކުރުވައިގެން މިކުޅެނީ ކޮންހާ ޑްރާމއެއް ހެއްޔެވެ.

މި މީހުން މިހާރު ގައުމުގެ މިސްރާބު ކަތިވެގެން އުޅޭއިރު، ފަސް އަހަރު ލިބިގެން ދިޔައިރު މިސްރާބު ނޭނގޭ ހާލު ކުރި ދަތުރު ނާމާންވެ ގައުމުގެ ރައޔްިތުން އަމާން މަންޒިލަކަށް ނައު ބަދަލުކޮށްލަން މަޖްބުރުވެގެން ވޯޓުގެ ސަމުގާއިން މިސްރާބު ބަދަލުކުރި ހަނދާން ހަމަ ނެތުނީހެއްޔެވެ.

ކޯވިޑޭ ކިޔައިގެން ގައުމުގެ މުޅި އިގްތިސޯދު ފުނޑާލާ މުޅި ގައުމު ހަފުސްކުރިއެވެ. ރައްޔިތުންގެ ޖީބުތައް ދޮވެ ހުސްކޮށްލީއެވެ. މުޅި ގައުމު އިގްތިސޯދީ ގޮތުން ބަލާނަމަ އޮތީ ހަމަ ކިރިިޔާ ނޭވާ ލާ ނުލާ ހިސާބުގައެވެ. ގައުމުގައި އޭރު އެކަމާ މެދު ވިސްނި ވެރިއެއް އެއް ނެތެވެ. ދައުލަތުގެ މާލިއްޔާ ހުސްކޮށްލީއެވެ. ސޮވެރިން ފަންޑު ފެންފޮދަކާ ނުލާ ދިރުވާލީއެވެ.. މިވަރު ބަޔަކު ސަމުގާ ހިފައިގެން ނުކުމެ މިއުޅެނީ ކުރިން ކުރި ހުރިހާ ކަމެއް ކެންސަލްކުރެވިދާނެއޭ ހިތާހެއްޔެވެ.

ގައުމަށް އިގްތިސޯދީ ބޫމެއް އަންނާނެ ކަމަށް އޭރު ރައީސް މީހާ ވިދާޅުވި ވިދާޅުވުން ވެގެން ދިޔައީ މުޅިން އެހެން ކަހަލަ ބޫމްއަކަށެވެ. އައި ބޫމް ބޫމް ބޫމް ލާފައި އައިސް ހިފައިގެން ދިޔައީ ގައުމުގެ އިސްލާމްދީނާ މިނިވަންކަމެވެ. ދިވެހިންގެ ހަމަޖެހުމާ އެއްބައިވަންތަކެމެވެ. ދިވެހި ފަސްގަނޑާ ފަޅު ފަޅާ ފަރު ފަރާ ގިރިގިރި އާ ހާހަލެއް ހިފައިގެން ބޫމް ދިޔައިރު މުޅި ދައުލަތް އޮތީ ގިރިއަކަށް އަރާ އޮޑީގެ ވަހުދާ ފަރުމަ މައްޔާ އެކީ ފޫގޮއްސައެވެ.

މިވަރުންވެސް މިކިޔަނީ މި ގައުމު ހަމަމަގަށް އަޅުވާނަމޭ ހެއްޔެވެ.

ގައުމުގެ މިނިވަންކަމާ އިސްތިގުލާލު އަދި ދީން، 2 ބިހާ ބިރިޔާނި ތައްޓަކަށް ވިއްކާލި ބަޔަކަށް ގައުމު އެޅުވޭނީ ހަމަމަގަކަށްވެސް ނޫނެވެ. ދިވެހިންގެ މިނިވަންކަން ވިއްކާލި ބަޔަކަށް، މިސްރާބު ހަމަމަގަށް އެޅުވިދާނެކަމަށް ތި ބޭފުޅުން ގަބޫލުކުރަންތޯއެވެ؟