ރާއްޖޭގެ ރައްޔިތުން ކުރީގެ ރައީސް އިބްރާހިމް މުހައްމަދު ޞާލިހަށް ދިން ފިލާވަޅު އަދުގެ ރައީސް ޑރ.މުހައްމަދު މުއިއްޒު ހަނދާންކުރަންޖެހޭކަމަށް ރައީސް އަބްދުﷲ ޔާމީން އަބްދުލްގައްޔޫމްގެ ޕާޓީ އުފެއްދުމުގައި އިސްކޮށް ހަރަކާތްތެރިވާ ޑރ. އަބްދުﷲ އިބްރާހިމް ވިދާޅުވެއްޖެއެވެ.

ޑރ.އަބްދުﷲ މިފަދައިން ވިދާލުވެފައިވަނީ އެކްސްގައި ކުރެއްވި ޕޯސްޓެއްގައެވެ.

އެގޮތުން ޑރ.އަބްދުﷲ ވިދާޅުވީ ރައީސް ޔާމީނަށް އަނިޔާ ދެމުން ގެންދަވަނީ ސިޔާސީ ގޮތުން މޮޅު ހޯއްދަވަންކަމަށެވެ. ނިމިދިޔަ ސަރުކާރުން ރައީސް ޔާމީނަށް ސިޔާސީ ބޭނުމެއްގައި އަނިޔާ ދެމުން ގެންދިޔުމުން ރައްޔިތުން ނިކުމެ ސަރުކާރު ބަދަލުކުރި ވާހަކަވެސް ޑރ.އަބްދުﷲ ވަނީ ފާހަގަކުރައްވާފައެވެ. އެހެންކަމުން އަދުގެ ސަރުކާރުން އެކަން މަތިން ހަނދާންކުރަންޖެހޭނެކަމަށްވެސް ޑރ. އަބްދުﷲ ވިދާޅުވިއެެވެ.

އިތުރަށް ޑރ.އަބްދުﷲ ވަނީ ރައީސް ޔާމިނަށް އިތުރަށް އަނިޔާ ނުކޮށް މިނިވަންކުރުމަށްވެސް ގޮވާލާފައެވެ.

ކުރީ ސަރުކާރުން ކަންތައް ކުރެއްވިގޮތައް އެ ގޯސް ތަކުރާރު ނުކުރެއްވުމަށާއި، ނުފޫޒު ފޯރުވުން ހުއްޓާލުމަށްވެސް ޑރ.އަބްދުﷲ ވަނީ ޕޯސްޓްގައި ގޮވާލާފައެވެ.

މި ސަރުކާރުން ވެރިކަމަށް އައީ ރައީސް ޔާމީން މިނިވަންކުރައްވާނެކަމަށް ބުނުމަށްފަހުއެވެ. ނަމަވެސް ވެރިކަން ލިބުމުން ރައީސް ޔާމީންގެ މަތިން ހަނދުމަފުޅު ނެތުނީކަމަށް ގިނަ ފަރާތްތަކުން އަންނަނީ ބުނަމުންނެވެ.