ފެންނަ ނުފެންނަ ވޯޓު ނެގުމަށްޓަކައި އުފައްދަން ޖެހޭ ގާނޫނު ހަދަން ރައްޔިތުންގެ މަޖިލީހުން އިއްޔެ ފާސްކުރި ބިލު ރައީސް މުއިއްޒު މިއަދު ތަސްދީގުކުރައްވައިފިއެވެ.
ޕީއެންސީގެ ޕާލަމެންޓަރީ ގްރޫޕްގެ ލީޑަރު އަދި އިނގުރައިދޫ ދާއިރާގެ މެންބަރު އިބްރާހީމް ފަލާހު ޖުލައި މަހުގެ ހަތްވަނަ ދުވަހު ހުށަހެޅުއްވި މި ބިލު އެ މަހުގެ ނުވަ ވަނަ ދުވަހު ކޮމިޓީއަށް ފޮނުވާފައިވާއިރު ކޮމިޓީން ބިލު ދިރާސާކުރި މަރުހަލާގައި ވަނީ ކުދި ބަދަލުތަކެއް ގެނެސްފައެވެ.
އޭގެ ތެރޭގައި، އާންމު ވޯޓު ނެގުމަށް މަޖިލީހަށް ލާޒިމުވާ ހާލަތްތަކުގައި އެ ވޯޓު ނެގުމަށް ކަނޑައަޅާނީ ޖަލްސާއަށް ހާޒިރުވާ މެންބަރުންގެ އަޣުލަބިއްޔަތުން ފާސްކުރާ ގަރާރަކުން ކަމަށް މީގެ ކުރިން އޮތް އޮތުން ބަދަލުކުރުން ހިމަނާފައިވެއެވެ.
އިއްޔެ މި ބިލު މަޖިލީހުން ފާސްކޮށްފައިވާއިރު، މިއަދު ރައީސް މުއިއްޒު ވަނީ ބިލު ތަސްދީގުކުރައްވާފައެވެ.
އެ ބިލުގައި ވަނީ މަޖިލީހުން ފާސްކުރާ ބިލެއް ރައީސުލްޖުމްޙޫރިއްޔާ ތަސްދީގުނުކުރާ ހާލަތުގައި، އެ ބިލަކަށް ރުހުން އޮތްތޯ ބެލުމަށް ވެސް އާއްމު ވޯޓެއް ނެގޭނެ ކަމަށް ބަޔާންކޮށްފައެވެ.
އާއްމު ވޯޓު ނެގޭނެ ކަންކަން
ފާހަގަކުރެވޭ ވަކިވަކިން ތިން އިންތިޚާބު އޮތުމުން ޚަރަދު ބޮޑުވެ އެކަމުގެ ބުރަ ދައުލަތަށާއި، އިލެކްޝަންސް ކޮމިޝަނަށް އުފުލަން ޖެހުމުގެ ކަންބޮޑުވުމުގެ ވާހަކަ މީގެ ކުރިން ދެކެވިފައިވާއިރު ރައީސް މުއިއްޒު އެ ކަމަށް ހުށަހެޅުއްވި ހައްލަކީ، ރިޔާސީ އިންތިޚާބު އެއްބުރުން ނިންމައިލުމާއި މަޖިލީހާއި ރިޔާސީ އިންތިޚާބު އެކުއެކީ ބޭއްވުމެވެ.
